Foto: DXX

Fargʻona viloyatining Qoʻqon shahrida qalbaki 315,5 mln soʻm va 120 ming dollarni muomalaga chiqarish uchun saqlab kelayotgan 22 yoshli shaxs ushlandi. Bu haqda Davlat xavfsizlik xizmati xabar berdi.

Maʼlum qilinishicha, DXXning Fargʻona viloyati boʻyicha boshqarmasi Qoʻqon shahar boʻlimi xodimlari tomonidan iqtisodiy jinoyatlarga qarshi kurashish doirasida olib borilgan tezkor-qidiruv tadbirlari davomida 22 yoshli mahalliy fuqaro qalbaki pullarni muomalaga kiritish bilan shugʻullanayotganligi aniqlangan.

Bosh prokuratura huzuridagi Departamentning Qoʻqon shahar boshqarmasi bilan hamkorlikda oʻtkazilgan tezkor tadbirda, mazkur shaxs 50 mln soʻm miqdoridagi qalbaki pullarni “shartli xaridor”ga haqiqiy 8 mln soʻm evaziga sotgan vaqtida ashyoviy dalillar bilan ushlangan.

Shuningdek, tezkor tadbir davom ettirilib, uning yashash xonadoni ham xolislar ishtirokida koʻzdan kechirilgan. Natijada, 50, 100 va 200 ming soʻmlik jami 315,5 mln soʻm miqdoridagi qalbaki kupyuralar hamda 100 dollarlik jami 120 ming dollar miqdoridagi qalbaki kupyuralar topilgan va tegishli tartibda olib qoʻyilgan.

Hozirda qalbaki “pulfurush”ga nisbatan jinoyat ishi qoʻzgʻatilib, ushbu qalbaki pul mablagʻlarini unga yetkazib bergan fuqarolarning shaxsiga aniqlik kiritish boʻyicha zarur chora-tadbirlar amalga oshirilmoqda.