Foto: Xalq so‘zi

Bojxona organlari tomonidan valyuta qimmatliklarini turli qingʻirliklar bilan mamlakatimizdan noqonuniy olib chiqishga qarshi tizimli ravishda kurash olib borilmoqda.

Jumladan, Fargʻona viloyati bojxona boshqarmasi “Fargʻona” chegara bojxona xodimlari post orqali harakatlanayotgan fuqaro I.Sh. boshqaruvidagi «Lasetti» rusumli avtotransport vositasini belgilangan tartibda koʻzdan kechirdi. Natijada avtomashina salonida yashirin joyda bojxona xodimining ogʻzaki soʻrovida maʼlum qilinmagan va yoʻlovchi bojxona deklaratsiyasida koʻrsatilmagan, belgilangan meʼyordan ortiqcha boʻlgan jami 20 ming AQSH dollari miqdoridagi valyuta qimmatliklari borligi aniqlanib, ashyoviy dalil tariqasida olindi.

Yana bir shunga oʻxshash holat. “Fargʻona aeroporti”da xorijga uchib ketish maqsadida post orqali “yashil yoʻlak” orqali harakatlanayotgan fuqaro N.R. toʻxtatilib, unga tegishli boʻlgan qoʻl yuklari belgilangan tartibda bojxona nazoratidan oʻtkazildi. Ushbu yuklar orasida bojxona organi xodimining ogʻzaki soʻrovida maʼlum qilinmagan hamda yoʻlovchi bojxona deklaratsiyasida koʻrsatilganidan ortiqcha boʻlgan 9 ming AQSH dollari miqdoridagi valyuta qimmatliklari borligi aniqlanib, ashyoviy dalil tariqasida olindi.

Mazkur holatlar yuzasidan bojxona organlari tomonidan tergovga qadar tekshiruv harakatlari olib borilmoqda.