Foto: Халқ сўзи

Fargʻona viloyati hokimi Xayrullo Bozorov Yaponiyaning “Yamanashi Gakuin” taʼlim korporatsiyasi boshqaruvi vakillari Daiji Yamada va Samuyel Tanni qabul qildi.

Uchrashuvda viloyat taʼlim tizimida Yaponiya tajribasini tadbiq qilish loyihalarini amalga oshirish istiqbollari muhokama etildi.

“Yamanashi Gakuin” taʼlim majmuasi anʼanaviy yapon madaniyati va qadriyatlariga asoslangan boʻlib, unda maktabgacha taʼlim muassasasi, umumiy oʻrta maktab, kollej va universitet bitta yaxlit shaharchani tashkil etadi. Kompaniya muassisligida real va virtual taʼlimga yoʻnaltirilgan innovatsion oʻquv metodikasi ishlab chiqilgan hamda ushbu tizim raqamli oʻquv platformasi yordamida amalga oshiriladi.

Kompaniya mutasaddilari maktabgacha taʼlim muassasasi va umumtaʼlim maktabi loyihasi uchun 10 million dollargacha investitsiya kiritishga tayyor ekanligini maʼlum qilishdi. Yangi taʼlim majmuasini Fargʻona shahrida barpo etilayotgan Ekoshahar hududida joylashtirish borasida oʻzaro fikr almashildi.

Botir Madiyorov, “Xalq soʻzi”.