Yurtimizda eng ulugʻ, eng aziz bayram shukuhi kezayotgan shu kunlarda Fargʻona shahridagi Abdulla Qodiriy mavzesida harbiy xizmatchilar uchun barpo etilgan 8 qavatli yangi uy foydalanishga topshirildi.

Tantanali tadbirda Fargʻona viloyati hokimi, harbiy-maʼmuriy sektor rahbari Xayrullo Bozorov, Sharqiy harbiy okrug qoʻshinlari qoʻmondoni, general mayor Oybek Saidov, harbiy xizmatchilar, ularning oila aʼzolari hamda keng jamoatchilik vakillari qatnashdi.

Taʼkidlab oʻtilganidek, keyingi yillarda Qurolli Kuchlarimizni isloh etish, shu bilan birga harbiy xizmatchilar oilalarini ijtimoiy himoyasini taʼminlash borasida izchil saʼy-harakatlar olib borilmoqda. Ezgu tashabbuslar ijobati yoʻlida xizmat uylari, yangi uy-joylar qurilib, dastlabki toʻlovlari imtiyozli tarzda davlat tomonidan qoplab berilayotgani fikrimizning yorqin dalilidir.

Ayni jarayonda 2020-yildan buyon Fargʻona viloyatida ham 540 nafar harbiy xizmatchi va ularning oila aʼzolariga namunaviy uy-joylar topshirildi. Bugun esa yana 50 ta harbiy oila oʻz xonadonlariga ega boʻldi.

— Bugun 3 nafar farzandim bilan yangi uyga koʻchib oʻtdik, — deydi mayor Azizbek Madaminov. — Yangi uyli boʻlish tuygʻusi odamni behad ruhlantirib yuborar ekan. Bunday eʼtibor va ragʻbatdan juda ham minnatdormiz.

Oila bekasi Nargiza Madaminova oʻqituvchi. Uning aytishicha, bu yangilik qoʻshaloq bayramlar oldidan oʻzi va farzandlari uchun unutilmas xursandchilik boʻldi.

— Bizning davrimizda bu kabi qulayliklar yoʻq edi, — deydi isteʼfodagi podpolkovnik Vohidjon Toshaliyev. — Bugungi sharoitlar, imtiyoz va imkoniyatlarga havas qilsa arziydi. Ayniqsa, harbiy xizmatchiga uy topshirilishi uning koʻnglini xotirjam qiladi va masʼuliyatini yanada oshiradi.

Tadbir davomida ramziy tasma qirqilib, yigʻilganlar zamonaviy koʻrinishga ega shinam xonadonlarda yashovchilar uchun yaratilgan shart-sharoitlarni koʻzdan kechirishdi. Nuroniylar duoga qoʻl ochib, elga tinchlik va xotirjamlik, oilalarga baxtu saodat soʻrab tilak bildirdi.

Botir MADIYOROV

“Xalq soʻzi”.