Foto: Xalq so‘zi

Fargʻona viloyati hokimi Xayrullo Bozorov eronlik investor Mahmud Shokiriy boshchiligidagi tadbirkorlar delegatsiyasi bilan uchrashdi.

Uchrashuvda viloyatning Yozyovon tumanida bunyod etilayotgan “Yangi Oʻzbekiston” dahasida koʻp qavatli turar joylar barpo etish, shuningdek, 20 gektarlik logistika markazi qurish loyihalari muhokama qilindi.

Muloqotda Mahmud Shokiriy Yozyovon tumanidagi “Yangi Oʻzbekiston” dahasi qurilishiga 156 million AQSH dollari hajmida toʻgʻridan-toʻgʻri investitsiya kiritishni rejalashtirilayotgani, yaqin kunlarda ushbu mablagʻning bir qismi kelib tushishi va amaliy ishlarga kirishilishini maʼlum qildi.

— Zamonaviy shaharsozlik meʼmorchiligi anʼanalari asosida ishlab chiqilgan loyiha uch yilga moʻljallangan boʻlib, “Yangi Oʻzbekiston”da 138 ta koʻp qavatli turar joylar qad rostlaydi, — deydi Yozyovon tumani hokimi Dilshod Jalilov. — Bu kabi xorijlik salohiyatli tadbirkorlarning jalb etilishi yangi shaharchada muhtasham uylar hamda qoʻshimcha qulayliklar yaratuvchi infratuzilma obyektlarini qurishda muhim ahamiyatga ega.

Botir Madiyorov, “Xalq soʻzi”.