Koreya Respublikasida vaqtinchalik ishlash istagida boʻlgan fuqarolar uchun Toshkent shahrida boʻlib oʻtayotgan EPS-Topik test imtihonlarida boshqa fuqaro oʻrniga testga kirish va testda qoʻshimcha vositalardan foydalanishga urinish holatlari qayd etilayotgani hamda buning oqibatlari haqida xabar berilgan edi.

Shunga qaramay, 20-iyun kuni roʻyxatdan oʻtgan 4 nafar fuqaroning, bugun, 22-iyun kuni 1 nafar fuqaroning telefon va maxsus vositalardan foydalanishga urinish bilan bogʻliq harakatlari aniqlandi. Ushbu holatlar bayonlashtirilib, tegishli tashkilotlarga taqdim etildi.

"Shu munosabat bilan, test imtihoni qoidalarini buzgan fuqaro 3 yil davomida ushbu imtihonda qatnashish imkoniyatidan mahrum boʻlishi hamda qonunchilikda belgilangan javobgarlikka tortilishi mumkinligi haqida yana bir bor ogohlantiramiz.

Imtihon jarayonida barcha tartib-qoidalarga rioya qilishga chaqiramiz" deyiladi Tashqi mehnat migratsiyasi agentligi rasmiy axborotida.