Elektron sigaretalar – koʻp va bir marta ishlatiladigan moslamalar boʻlib, ular elektr toki (akkumulyator) yordamida nikotinli suyuqliklarni qizdiradi hamda isteʼmolchi nafas oladigan tutunni hosil qiladi.

— Elektron sigaretalar veyp, elektron sigara, elektron chilim, deb ham ataladi, — deydi Sogʻliqni saqlash vazirligining tamakiga qarshi kurashish boʻyicha bosh konsultanti Shuhrat Shukurov. — Ular tarkibida nikotin miqdori 0 mg/ml dan 66 mg/mlgacha va undan yuqori boʻlishi mumkin. Bu – nikotin miqdori odatiy sigaretadan kamida ikki marta koʻproq degani.

Chekuvchining organizmiga salbiy taʼsir qiladigan nikotin miqdori, uning konsentratsiyasidan tashqari, bir necha omilga bogʻliq. Moslama ishlab chiqaradigan elektr quvvati, tortish usuli, chekuvchi tomonidan suyuqlikka turli qoʻshimchalarni qoʻshish nikotin miqdorini oshirishi mumkin.

Nikotin – odamlarda jismoniy va ruhiy qaramlikni chaqiradi. Qolaversa, yurakka va markaziy asab tizimiga tez taʼsir qiluvchi zahar hisoblanadi.

Nikotin tamaki tarkibidagi asosiy narkotik modda boʻlib, zamonaviy sigaretalar tuzilmalarining oʻziga xos xususiyatlari tufayli qaramlik xavfini orttiradi. Bu – giyohvand moddalar keltirib chiqaradigan xavfdan ham yuqori.

Elektron sigaretadagi suyuqliklarda nikotin miqdori turlicha boʻlishidan tashqari, ular tarkibida suv, propilenglikol, glitserin, aromatizatorlar va boshqa birikmalar mavjud.

Ushbu moddalar bugʻlanish jarayonida turli birikmalarni hosil qiladi va ularning baʼzilari oʻta zaharli hisoblanadi.

Ayniqsa, aromatizatorlar elektron sigaretalardagi moddalarning zararlilik xususiyatini yanada kuchaytiradi.

Shuningdek, ular nikotinli aerozolning achchiq, yoqimsiz taʼmi va hidini yashiradi. Bu esa atrofdagilarda elektron sigaretalarni sinab koʻrishga moyillikni oshiradi.