Foto: Bosh prokuratura huzuridagi Departament

Bosh prokuratura huzuridagi Departament bir nechta YaTT va MChJlarning energiya resurslariga noqonuniy ulanish holatlarini fosh etdi. Bu haqda Departamentning matbuot xizmati xabar berdi.

Maʼlum boʻlishicha, Bosh prokuratura huzuridagi Departamentning Kattaqoʻrgʻon va Pastdargʻom tumani boʻlimlari tomonidan oʻtkazilgan tergovga qadar tekshiruvlarda ushbu holatlar aniqlangan.

Qayd etilishicha, ushbu hududlardagi “F.Z.” fermer xoʻjaligi rahbari G.X. hamda YaTT E.N. elektr suv nasoslarini tijorat maqsadida tarmoqqa oʻzboshimchalik bilan ulab, jami 217,4 million soʻmlik elektr energiyasidan noqonuniy foydalanganliklari aniqlangan.

Shu kabi holatlar Andijon viloyatida ham qayd etilgan. Departamentning Andijon shahri va Baliqchi tumani boʻlimlari tomonidan oʻtkazilgan tergovga qadar tekshiruvlarda fuqaro X.K. va “S.V.” MCHJ masʼul shaxslari tijorat maqsadida oʻzlariga tegishli savdo doʻkonlarini umumiy foydalanishdagi elektr tarmogʻiga toʻgʻridan-toʻgʻri ulab, jami 214,5 million soʻmlik elektr energiyasidan noqonuniy foydalanganliklari oshkor boʻlgan.

Departamentning Jizzax shahar boʻlimi tomonidan oʻtkazilgan tergovga qadar tekshiruvda fuqaro B.B. yashash xonadonida tijorat maqsadida umumiy foydalanishdagi gaz tarmogʻiga ulanib, ishlab chiqarish faoliyati bilan shugʻullanib kelib, jami 151,8 million soʻmlik tabiiy gazdan noqonuniy foydalanganligi fosh qilingan.

“Mazkur holatlar yuzasidan Jinoyat kodeksining 169-moddasi (oʻgʻrilik) bilan jinoyat ishlari qoʻzgʻatilib, tergov harakatlari oʻtkazilmoqda”, deyiladi xabarda.

Avvalroq, Oʻzbekistonliklar qaysi davlatlarga koʻproq sayohat qilishayotgani haqida xabar berilgandi.