Illyustrativ foto

Yevropa Ittifoqi (YI) Rossiya bilan gaz shartnomalarini jarima toʻlamasdan bekor qilish yoʻllarini qidirmoqda, deb yozdi “Financial Times” gazetasi oʻz manbalarga tayanib.

“Bryussel Yevropa kompaniyalariga Moskvaga katta jarimalar toʻlamasdan, Rossiya gazini yetkazib berish boʻyicha uzoq muddatli shartnomalarni buzishga imkon beradigan qonuniy variantlarni oʻrganmoqda”, — deyiladi nashrda.

Gazetaning qayd etishicha, bu masala Rossiya energetika resurslaridan voz kechish boʻyicha yoʻl xaritasining bir qismi sifatida koʻrib chiqilmoqda.

Ushbu yoʻl xaritasi ustidagi ishlar haqida shu yilning yanvar oyida Yevropa Komissiyasi vakili Anna-Kaisa Itkonen tomonidan maʼlum qilindi.

Uning soʻzlariga koʻra, energetika boʻyicha Yevropa komissari hujjatni oʻtgan yilning 1-dekabridan boshlab joriy yilning mart oyining birinchi yarmida taqdim qilishi kerak edi. Bir kun oldin “Bloomberg” reja 6-may kuni eʼlon qilinishi haqida xabar bergan edi.

Moskva Yevropa davlatlari Rossiya uglevodorodlarini rad etib, jiddiy xatoga yoʻl qoʻyganini va shu tariqa yangi qaramlikka tushib qolganini bir necha bor taʼkidlagan. Endi ular Rossiya neft va gazini vositachilar orqali, yuqori narxlarda sotib olishadi.

Rossiya prezident Vladimir Putinning taʼkidlashicha, uning mamlakati Yevropaga gaz yetkazib berishdan bosh tortmaydi va uni olishning bir qancha yoʻllari mavjud.

Ukrainada maxsus operatsiya boshlanganidan soʻng Gʻarb davlatlari Moskvaga nisbatan sanksiyalarni kuchaytirdi. Putinning aytishicha, AQSH va uning ittifoqchilarining asosiy maqsadi millionlab odamlarning hayotini yomonlashtirishdir. Shunga qaramay, Rossiya bu bosimga dosh bermoqda va Gʻarbning oʻzida kiritilgan cheklovlar samarasiz ekanligi haqida bir necha bor fikrlar bildirilgan. Shu bilan birga, cheklovlarga qoʻshilgan davlatlarda Rossiyaga qarshi sanksiyalar siyosati muvaffaqiyatsizlikka uchraganini tan olishga jasorat yetishmayapti.