Foto: Халқ сўзи

Andijon tumanidagi “Andijon gullar bogʻi” korxonasi qoshida gulchilik oʻquv markazi ish boshladi. Unda mahallalardagi “Temir daftar” va “Ayollar daftari”ga kirgan xotin-qizlarga uy sharoitida gul hamda manzarali daraxt koʻchatlarini yetishtirish orqali daromad ishlab topish sirlari oʻrgatilmoqda.

— “Gul yetishtiruvchilar uyushmasi” koʻmagida tashkil etilgan markazimizda hozirda 15 nafar opa-singillarimiz gulchilikka oid bilim va koʻnikmalarni oʻzlashtirmoqda, — deydi tadbirkor Nodiraxon Nasriddinova. — Ularga qalamchani undirishdan tortib xaridorga koʻchat yetkazib berishgacha boʻlgan jarayon oʻrgatiladi. Buning uchun Turkiyadan soha mutaxassisini taklif etganmiz.

Oʻquv markazining aynan shu korxonada tashkil etilishining sababi bor. Bu yerdagi bogʻda parvarishlanayotgan 30 ming tup gul va manzarali butalar xorijdan keltirilgan boʻlib, ulardan olingan koʻchatlar Rossiya, Qozogʻiston, Tojikiston, Qirgʻiziston kabi davlatlarga eksport qilinmoqda.

Saminjon HUSANOV, “Xalq soʻzi”.