Dushanbeda Shavkat Mirziyoyevni rasmiy kutib olish marosimi boʻldi. Prezidentlar tor doirada muloqot qildi (foto)

13:55 10 Iyun 2021 Siyosat
670 0

Dushanbe shahridagi “Qasri Millat” qarorgohida Oʻzbekiston Respublikasi Prezidentini rasmiy kutib olish marosimi boʻldi.

Oliy martabali mehmon sharafiga faxriy qorovul saf tortdi, ikki mamlakat davlat madhiyalari yangradi.

Prezidentlar bir biriga rasmiy delegatsiya aʼzolarini tanishtirdi. Faxriy qorovul tantanali marsh bilan davlat rahbarlari oldidan oʻtdi.

Shundan soʻng Shavkat Mirziyoyev va Emomali Rahmonning tor doiradagi uchrashuvi boshlandi. Unda davlat rahbarlari Oʻzbekiston va Tojikiston strategik sherikligi va koʻp qirrali hamkorligining barcha jihatlarini koʻrib chiqdilar, siyosiy muloqotni yana-da mustahkamlash, savdo-iqtisodiy va investitsiyaviy hamkorlikni rivojlantirish, madaniy-gumanitar aloqalarni kengaytirishga alohida eʼtibor qaratdilar.

Markaziy Osiyoda xavfsizlik, barqarorlik va izchil taraqqiyotni taʼminlash, xalqaro va mintaqaviy tuzilmalar doirasida hamkorlik qilish masalalari yuzasidan fikr almashildi.

Prezidentimiz taklif va samimiy qabul uchun minnatdorlik bildirib, ikki mamlakat munosabatlari yuksak darajaga koʻtarilganini taʼkidladi.

– Qabul qilgan barcha qarorlarimiz amalga oshmoqda. Oʻtgan davrda ikki tomonlama munosabatlarda koʻp narsa oʻzgardi. Buni raqamlar ham aytib turibdi. 2017-yilda tovar ayirboshlash 70 million dollar boʻlgan boʻlsa, 2020-yilda, murakkab pandemiya yilida ushbu koʻrsatkich ilk bor 500 million dollarga yetdi. Biz ushbu tashrifga juda jiddiy tayyorgarlik koʻrdik. Hududlar forumi muvaffaqiyatli oʻtkazildi, qiymati qariyb 700 million dollar boʻlgan aniq loyiha va shartnomalar imzolandi. Madaniy-gumanitar aloqalar haqida aytsak, birinchi bor Tojikistonda Oʻzbekiston kinosi kunlari muvaffaqiyatli oʻtdi, yaqin orada mamlakatlarimiz yoshlari Fargʻona vodiysida uchrashadi. Bir soʻz bilan aytganda, tarixiy yaqinligimiz bugun hayotga koʻchmoqda, - dedi Shavkat Mirziyoyev.

Tojikiston Prezidenti davlatimiz rahbarini samimiy qutlab, ushbu tashrifning ahamiyatini alohida qayd etdi.

– Oʻzbekiston bizning strategik sherigimiz va ishonchli qoʻshnimiz. Tojikiston-Oʻzbekiston munosabatlari bugun jadal rivojlanayotganidan mamnunmiz. Savdo-iqtisodiy aloqalar kengaymoqda. Madaniy-gumanitar sohadagi oʻzaro munosabatlar mustahkamlanmoqda. Mamlakatlarimiz mintaqaviy xavfsizlik borasida oʻzaro muvofiqlashib, yaqindan hamkorlik qilib kelayotganini alohida qayd etmoqchiman. Bugun siz bilan munosabatlarimizning holati va istiqbollarini hamda xalqaro va mintaqaviy masalalarni muhokama qilishga tayyorman, – deb taʼkidladi Emomali Rahmon.

Qoʻshma korxonalar soni 8 barobar koʻpayib, bugungi kunda 200 dan oshgani taʼkidlandi. Jumladan, Dushanbe shahrida maishiy texnikalar ishlab chiqaruvchi “Artel Avesto Elektroniks” qoʻshma korxonasi samarali ish yuritmoqda. Tashrif arafasida 30 dan ortiq shunday loyihalar ishlab chiqildi.

Oʻtgan yilgi qiyin sharoitlarda ham yuk tashish va tranzit hajmi oshgani qayd etildi. Ikki tomonlama chegirma va imtiyozlar taqdim etilmoqda. Poytaxtlar oʻrtasida aviaqatnov tiklandi.

Uchrashuvda tovar ayirboshlash hajmini oshirish, ikki mamlakat hududlari salohiyatini samarali ishga solish, iqtisodiyotning turli tarmoqlarida sanoat kooperatsiyasini tashkil etish boʻyicha aniq takliflar ilgari surildi. Koʻp qirrali hamkorlikning yangi “oʻsish nuqtalari”ni topish muhim ekani taʼkidlandi. Shuningdek, parlamentlararo aloqalar, madaniy-gumanitar almashinuv, barqarorlik va xavfsizlikka nisbatan tahdid va xatarlarga qarshi kurashish borasidagi hamkorlikni mustahkamlash masalalariga toʻxtalib oʻtildi.

Prezident Shavkat Mirziyoyev Oʻzbekiston xalqi va oʻzi nomidan birodar Tojikistonni mustaqilligining boʻlajak 30 yilligi bilan tabrikladi, tinchlik, farovonlik va ravnaq tiladi.

Davlatimiz rahbari Prezident Emomali Rahmonni oʻzi uchun qulay vaqtda javob tashrifi bilan Oʻzbekistonga borishga taklif etdi.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?