Oʻtgan haftada Yer yuzi boʻyicha 2,7 milliondan ortiq kishida koronavirus infeksiyasi aniqlandi. Ulardan 13 ming nafarga yaqini kasallik oqibatida hayotdan koʻz yumdi.

Jahon sogʻliqni saqlash tashkiloti tahliliga koʻra, 9-15-yanvar sanalarida xastalanish koʻrsatkichlari undan avvalgi haftaga nisbatan 9 foizga kamaydi, oʻlim holatlari esa aksincha qariyb 1 foizga oshdi.

Tashxislar sonining sezilarli pasayish dinamikasi asosan Afrika (-40 foiz), Yevropa (-35 foiz) va Janubi-Sharqiy Osiyo (-17 foiz) mamlakatlarida kuzatildi.

Oʻlim koʻrsatkichlari esa Gʻarbiy Tinch okeani mintaqasida 43 foiz, Janubiy va Shimoliy Amerikada 10 foiz hamda Sharqiy Oʻrta yer dengizi mintaqasi mamlakatlarida 9 foizga oʻsdi.

Oʻtgan haftada eng koʻp bemorlar aniqlangan mamlakatlar:

— Yaponiya — 1 million,

— AQSH — 416 ming ,

— Janubiy Koreya — 286 ming,

— Avstraliya — 191 ming,

— Xitoy — 190 ming.

Eng koʻp oʻlim holatlari qayd etilgan davlatlar:

— AQSH — 3922,

— Yaponiya — 2849,

— Xitoy — 802,

— Avstraliya — 742,

— Fransiya — 520.

Eslatib oʻtamiz, mutaxassislar dunyoda koronavirusdan oʻlim koʻrsatkichlari hamon yuqoriligi bois barcha aholi qatlamiga toʻliq bosqichda va buster dozada emlanishni tavsiya etmoqda.