“Kosmik tarmoqni yanada rivojlantirish boʻyicha qoʻshimcha chora-tadbirlar toʻgʻrisida”gi Prezident qarori (PQ–429-son, 23.11.2022-y.) qabul qilindi.

Qarorga koʻra, kosmik monitoring ishlarini amalga oshirish va davlat boshqaruvi organlarini kosmik suratlar bilan taʼminlash, shuningdek, kosmik texnologiyalarni qoʻllash orqali ijtimoiy-iqtisodiy, ilm-fan, mudofaa va xavfsizlik sohalarida kosmik faoliyat natijalaridan samarali foydalanish yoʻlga qoʻyiladi.

2023-yil 1-fevralgacha davlat kosmik monitoringi oʻtkaziladigan sohalarga oid davlat kadastrlari maʼlumotlari “Elektron hukumat”ning idoralararo maʼlumotlar uzatish tarmogʻi orqali taqdim etish boʻyicha oʻzaro integratsiya qilinadi.

Qarorga koʻra shuningdek, Oʻzbekiston hududida foydalanilayotgan, sotish yoki shaxsiy foydalanish uchun olib kiriladigan va ishlab chiqariladigan sunʼiy yoʻldosh orqali ishlovchi mobil qurilmalar va terminallarni roʻyxatga olish tartibi ishlab chiqiladi.