Stenford universitetining yirik ochiq onlayn kurs provayderi 2024-yil uchun oʻz hisobotini eʼlon qildi. Ushbu hisobotda Oʻzbekiston uchun quvonarli yangilik ham mavjud.

«Coursera»dagi maʼlumotlarga qaraganda, Oʻzbekiston mehnat bozori uchun zaruriy koʻnikmalarga ega kadrlarni tayyorlashga sarmoya kiritilayotgan mamlakatlar reytingida birinchi oʻrinni egalladi. Gap shundaki, mehnatga yaroqli aholining 6,25 foizi Oʻzbekistonda platformaning onlayn oʻquvchilari hisoblanadi.

Raqamli texnologiyalar vazirligi huzuridagi Raqamli taʼlimni rivojlantirish markazi «Coursera» global onlayn taʼlim platformasining Markaziy Osiyo mintaqasi koordinatori Eduard Kanga tayanib, platformaning oʻzbekistonlik foydalanuvchisi sonini 1,1 milliard ekanligini yozgan edi.

Soʻngra «Xalq soʻzi»ga bu son 1,1 milliard emas, 1,1 million ekanligini, texnik sabablarga koʻra, maʼlumot xato ketganligini bildirib, xabar ijtimoiy tarmoqlardagi sahifasida tahrirlab qoʻyildi.

«Shundan 90% ini talabalar tashkil qiladi. Eng talabgir yoʻnalishlar esa dasturlash, Data Ssiyense, kompyuter savodxonligi, grafika va dizayn hamda xorijiy tillarni oʻrganish ekani aniqlandi», deyiladi RTRM xabarida.

Yomon yangilik shundan iboratki, biznes, texnologiya va «data science» fanlari boʻyicha oʻquvchilarning «Coursera» va asosiy iqtisodiy koʻrsatkichlariga asoslangan «Global malaka darajasi» reytingida 109 mamlakat orasida 106 oʻrinni egalladik.

Platforma hisobotida Oʻzbekiston «Lagging countries» qatoriga (kechikayotgan) kiritilgan. Ushbu reytingda qoʻshnilarimiz, Qozogʻiston 32-oʻrinda qayd etilib, «Competitive» (raqobatbardosh) mamlakat sifatida koʻrsatilgan.

Avvalroq 2023-yildan «uzbekcoders» platformasi orqali «Coursera» onlayn kurslarida yoshlar uchun taʼlim olish imkoniyati yaratilib bergani, «Bir million dasturchi» loyihasi doirasida AKT sohasi boʻyicha «Coursera» platformasining professional kurslarida 1,1 ming nafarga yaqin, shuningdek, bepul kurslarida 215 ming nafardan ortiq yoshlar taʼlim olib, xalqaro IT sertifikatlarni qoʻlga kiritishgani haqida xabar bergan edik.