Botir MADIYOROV/“Xalq soʻzi”. Ayni kunlarda Botken viloyati sogʻliqni saqlashni muvofiqlashtirish va boshqarish markazi direktori Arzibek Borubekov boshchiligida bir guruh qirgʻizistonlik shifokorlar Fargʻona viloyati tibbiyoti yutuqlari bilan tanishdi.

Xususan, Fargʻona viloyati bolalar koʻp tarmoqli tibbiyot markazida oʻtkazilgan uchrashuvda shifo maskani faoliyati, bevosita chet eldan kelgan bemorlarga xizmat koʻrsatish sohasida erishilayotgan yutuqlar taqdimot qilindi.

Markazda 2019-yildan buyon xorijlik 18 yoshgacha boʻlgan bolalarga jahon andozalari darajasida malakali tibbiy xizmat koʻrsatish faoliyati yoʻlga qoʻyilgan. Oʻtgan davrda bu yerda 650 nafarga yaqin qirgʻizistonlik bemorlar davolandi.

— Yuzma–yuz muloqot chogʻida qardosh yurtdan kelgan hamkasblarimiz tibbiyot muassasasida yaratilgan sharoitlarni oʻz koʻzi bilan koʻrib, bevosita bemorlar bilan suhbatlashishdi, — deydi Fargʻona viloyati sogʻliqni saqlash boshqarmasi boshligʻi Bobur Primqulov. — Tashrif yakunida viloyat sogʻliqni saqlash boshqarmasida kengaytirilgan tartibda yigʻilish oʻtkazilib, tibbiyot turizmi yoʻnalishida hamkorlik memorandumi imzolandi.