Xorijiy kinokompaniyalar va kinostudiyalarni Oʻzbekiston Respublikasiga jalb etish maqsadida Toshkent viloyatining Boʻstonliq tumanida kamida 50 gektar maydonga ega kino shahar barpo etish rejalashtirilmoqda.

2022-2026-yillarda Yangi Oʻzbekistonni rivojlantirish strategiyasini amalga oshirish boʻyicha “yoʻl xaritasi” loyihasiga koʻra, 2022-yilda jahon tajribasini oʻrganib, kino shahar konsepsiyasini ishlab chiqishga xorijiy mutaxassislarni jalb etish koʻzda tutilgan.

Maʼlum qilinishicha, kino shahar yordamida Oʻzbekistonda milliy filmlar namoyishi va targʻibotini yuqori saviyada tashkil etish, filmlarni ommalashtirish va milliy kinoprokat tarmogʻini yaratish rejalashtirilgan.

Shu bilan birga, “Kinokaravon”ning ish tartibi mamlakatimizning har bir viloyati (shahari) ni hisobga olgan holda tasdiqlanadi. Reklama kampaniyasi tizimli yoʻlga qoʻyiladi, jahon tajribasi qoʻllaniladi, mamlakatimizdagi kinoteatrlar yagona tarmoqqa ulanadi. Filmlar onlayn tarzda yetkazib beriladi va namoyish qilinadi.

Bundan tashqari, respublikada milliy animatsiya sanoati shakllanadi va faol rivojlanadi. Kinematografiya agentligi qoshida “Oʻzbekmultfilm” kinostudiyasi tashkil etilib, uning faoliyati jahon tajribasiga asoslangan holda mahalliy va xorijiy mutaxassislarni jalb etadi.

Shuningdek, mutaxassislar tayyorlash boʻyicha tajriba almashish maqsadida xorijiy animatsion studiyalar bilan muzokaralar olib boriladi, malaka oshirish kurslari tashkil etiladi.

Xususiy animatsiya studiyalarini qoʻllab-quvvatlash, ularga imtiyozlar berish, subsidiya tizimini joriy etish rejalashtirilgan. Animatsiya sohasida faoliyat yurituvchi jamoat tashkilotlari, studiyalar va korxonalarga davlat buyurtmalarini joylashtirish boʻyicha tizimli ishlar amalga oshiriladi.