Bosh prokuratura Andijon davlat universitetida yuz bergan baxtsiz hodisa sabablarini maʼlum qildi 

11:31 05 Dekabr 2021 Jamiyat
751 0

Ijtimoiy tarmoqlarda bir ayol Andijon davlat universiteti Tarix fakulteti binosining 4-qavatidan tushib ketganligi haqida xabarlar tarqalgan.

Mazkur vaziyat haqida Bosh prokuratura matbuot xizmati bayonot berdi.

Xabarda qayt etilishicha, 4-dekabr kuni 28 yoshli ayol Andijon davlat universitetiga ushbu oliygohning 2-bosqich talabasining oila aʼzosi sifatida taʼmirlash ishlari amalga oshirilayotgan Tarix fakulteti binosida boʻlib oʻtadigan ota-onalar majlisiga kelgan.

Shunda u binoning 4-qavatida uyali aloqa telefon apparatidan foydalanib, ehtiyotsizligi oqibatida zinalarning toʻsiqlari boʻlmaganligi sababli zinapoyadan pastga yiqilgan va ogʻir tan jarohati olgan.

Olib borilgan tekshirish harakatlari davomida ushbu binoda taʼmirlash ishlarini olib borayotgan “S.Haus” MCHJ ishchilari tomonidan zinapoyalarning toʻsiqlari olib tashlanib, qurilish ishlari amalga oshirilayotganligi aniqlangan.

Mazkur holat yuzasidan “S.Haus” MCHJ mansabdor shaxslariga nisbatan Jinoyat kodeksining 257-moddasi (Mehnatni muhofaza qilish qoidalarini buzish) bilan jinoyat ishi qoʻzgʻatilgan.

Hozirda Andijon shahar IIOFMB huzuridagi Tergov boʻlimi tomonidan tergov harakatlari olib borilmoqda.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?