Mamlakatimizda aholining huquqiy ongi va huquqiy madaniyatini yuksaltirishga qaratilgan ishlar izchil amalga oshirilmoqda.

Adliya vazirligining buyurtmasiga binoan, Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi mablagʻlarini boshqarish boʻyicha Parlament komissiyasining qaroriga muvofiq, “Madad” – muassasa shaklidagi nodavlat notijorat tashkiloti “Bolalar yoʻl harakati ishtirokchisi” nomli loyiha oʻtkazilgan tanlov natijalariga koʻra gʻolib deb topilgan edi.

Loyiha maqsadi:

— aholi gavjum mahallalarida joylashgan Toshkent shahridagi 1 ta maktabgacha taʼlim tashkiloti va Fargʻona shahridagi 1 ta maktabda yoʻl harakati qoidalarini oʻrgatishga moʻljallangan oʻquv maydonchalarini tashkil etish;

— yoʻl harakati qoidalari boʻyicha yosh bolalarning bilim va koʻnikmalarini oshirish maqsadida didaktik oʻyinlarni oʻtkazish;

— bolalarni yoʻl harakati qoidalariga oʻrgatish uchun turli tanlovlar, viktorinalar va musobaqalarni tashkil etish hisoblanadi.

Unga koʻra, loyihani amalga oshirishga Toshkent shahri, Yunusobod tumanidagi 206-sonli davlat maktabgacha taʼlim tashkiloti biriktirilgan boʻlib, loyiha doirasida mazkur MMTda bolalar uchun zarur boʻlgan yoʻl harakati qoidalarini oʻrgatuvchi kerakli barcha belgilar bilan taʼminlangan yoʻl harakati maydonchasi qurilib, foydalanishga topshirildi hamda loyiha doirasida amalga oshirilgan ishlar sarhisobiga doir tadbir boʻlib oʻtdi.

Tadbirda Oʻzbekiston Respublikasi Adliya vazirligi vakillari, Oʻzbekiston Respublikasi Oliy Majlisi huzuridagi Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi mablagʻlarini boshqarish boʻyicha Parlament komissiyasi aʼzolari, Oʻzbekiston Respublikasi mudofaasiga koʻmaklashuvchi “Vatanparvar” tashkiloti hamda OAV vakillari ishtirok etishdi.

Hozirda ushbu maydonchada yoʻl harakatining bevosita ishtirokchisi hisoblangan bolalarga yoʻl harakati qoidalarini oʻrgatish boʻyicha dars jarayonlari olib borilmoqda.

Tadbir yakunida ishtirokchilar loyiha doirasida amalga oshirilgan ishlar nihoyatda dolzarb ekanligi, MTT tarbiyalanuvchilarining yoʻl-harakati qoidalarini oʻrganishdagi ahamiyati juda katta boʻlishi va ularning bu boradagi bilimlarni egallashiga beqiyos xizmat qilishini taʼkidladi.