Beshariqda “Andarxon” qovunchilik klasteri tashkil etiladi

12:39 24 Yanvar 2022 Jamiyat
284 0

Foto: Халқ сўзи

Fargʻona viloyati Beshariq tumanida qoʻshni Tojikiston Respublikasi bilan chegaradosh hududda joylashgan Andarxon qishlogʻi azaldan poliz ekinlari, xususan, mazasi til yorar qovunlari bilan mashhur.

Ayni paytda “Andarxon” MFYda 845 dan ziyod xonadon boʻlib, deyarli har bir oila qovun yetishtirish bilan shugʻullanadi. Andorxonliklar qish va bahor faslida ham oʻz xonadonida tabiiy usulda qovun saqlab, qoʻshimcha daromad topib kelmoqda.

— Shundan topadigan daromadimizning har yili choʻgʻi biland boʻladi, — deydi andarxonlik Shamsiddin ota Isomiddinov. — Bizda koʻproq boʻrikalla, qirqma, umrboqiy, kampirtoʻn singari qovun navlari saqlanadi. Qishloq ahli oʻzimizdan ortib Jizzax va Sirdaryo viloyatlarida ham dehqonchilik qiladi.

Shirindan shakar qovunlarni saqlashda qishloq hududining geografik joylashuvi ham muhim ahamiyatga ega. Hududning oʻziga xos shamoli va saqlash joylari qovunlarni hatto may oyigacha saqlash imkonini beradi.

Darvoqe, Fargʻona viloyati hokimligi tashabbusi bilan qovun yetishtirish ushbu mahallani rivojlantirishning “oʻsish nuqtasi” sifatida qayd etilib, “Andarxon” qovunchilik klasteri tashkil etish belgilandi. Demak, andarxonliklar uchun yana yangi imkoniyatlar eshigi ochiladi.

Botir Madiyorov, “Xalq soʻzi”.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?

Ko‘p o‘qilganlar

Yangiliklar taqvimi

Кластер