Bagʻdod tumanida mijozlarga mutolaa imkoniyatini taklif etuvchi tamaddixonalar koʻpaymoqda

12:38 25 Noyabr 2022 Jamiyat
306 0

Foto: Xalq so‘zi

Fargʻona viloyatining Bagʻdod tumanida yengil tamaddi qilish istagida boʻlgan xoʻrandalarga dastlab eng sara adabiyotlar va maxsus QR-kodli kitoblar “menyu”sini taqdim etuvchi tamaddixonalar koʻpaymoqda. Quvonarlisi, ushbu ezgu tashabbus aholiga umumiy ovqatlanish xizmati koʻrsatuvchi tadbirkorlar tomonidan bajonidil qoʻllab-quvvatlanayotir. Kuni kecha tumanning yana ikkita manzilida zamonaviy bukkafe (book-cafe) faoliyatini boshladi.

Tadbirkor Shohruh Abdurahimov oʻziga tegishli tamaddixonada bepul “WI-FI” hududi va moʻjaz kutubxona tashkil etdi. Bagʻdod tumani axborot-kutubxona markazi hamda Respublika Maʼnaviyat va maʼrifat markazining tuman boʻlinmasi koʻmagida bukkafedagi kitob javoniga oʻnlab yangi badiiy asar joylashtirildi. Shuningdek, oʻzbek va jahon adabiyoti durdonalarining elektron nusxasi tushirilgan QR-kodli maxsus banner ham oʻrnatildi.

—  Zamonaviy mezonlar asosida kitobxonlarimiz safini kengaytirib borish – asosiy maqsadimiz, — deydi Bagʻdod tuman axborot-kutubxona markazi rahbari Muattarxon Umarova. — Bu borada kitob mutolaasini ommalashtirishga befarq boʻlmagan tadbirkorlarning yordami katta boʻlmoqda. Bukkafelardagi kitoblar turli yoshdagi mijozlar uchun moʻljallangan va ular har hafta yangilanib turiladi.

Maʼlumotga koʻra, ayni paytda Bagʻdod tumani mahallalarida 40 ta “Ziyo doʻkoni”, 14 ta bukkafe hamda 20 dan ortiq manzilda bepul “WI-FI” hududlari faoliyat koʻrsatmoqda. Bu kabi ziyo maskanlarida 10 mingga yaqin kitobni asl va elektron koʻrinishida mutolaa qilish mumkin.

 

Botir Madiyorov, “Xalq soʻzi”.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?