Foto: Xalq so‘zi

Fargʻona viloyatining Bagʻdod tumanida "Fergana-spinning“ MCHJ shaklidagi paxta-toʻqimachilik klasteri tashabbusi bilan «Yashil makon» umummilliy loyihasi doirasida koʻp yillar davomida foydalanilmagan yer maydonida bodomzor barpo etildi.

Taʼkidlash kerakki, yaydoq dasht hududida bir giyoh undirish va undan hosil olish oson ish emas. Qaqrab-qaqshab yotgan ariqlarga suv keltirish mashaqqatiniku, gapirmasa ham boʻladi.

— Dashtga unumdor tuproq tashib keltirildi va 200 tup bodom koʻchati ekildi, — deydi klaster direktori yordamchisi Durbek Obobakirov. — Shu tariqa 1,5 kilometr masofadan yangi ariq qazib, nihollarni sugʻorish uchun suv ham keltirildi. Bogʻimiz gullab-yashnab hosilga kirsa, topilgan daromadni ijtimoiy himoyaga muhtoj oilalarni qoʻllab-quvvatlashga yoʻnaltirishni maqsad qilganmiz.

Aytish oʻrinliki, «Yashil makon» umummilliy loyihasi doirasida paxta-toʻqimachilik klasteri jamoasi tomonidan Bagʻdodda yangi yashil maydonlar barpo qilish va 10 ming tupdan ortiq gul, mevali va manzarali daraxt koʻchatlari ekish rejalashtirilgan.

Botir MADIYOROV, «Xalq soʻzi».