Avtomobillarga gaz toʻldirish kompressor shoxobchalari faoliyati qisqa muddatga vaqtincha toʻxtatildi — Energetika vazirligi murojaati

12:03 12 Yanvar 2023 Jamiyat
1293 0

Respublika boʻyicha anomal sovuq harorat davom etayotganligi sababli quvurlarda gaz bosimining keskin pasayishi kuzatilmoqda.

Shu munosabat bilan tabiiy gazni birinchi navbatda aholi xonadonlari, elektr energiyasi ishlab chiqaruvchi korxonalar hamda ijtimoiy soha obyektlariga yetkazib berish choralari koʻrilmoqda.

Shu maqsadda, ayrim yirik ishlab chiqaruvchi sanoat korxonalariga tabiiy gaz yetkazib berish hajmi keskin kamaytirildi hamda avtomobillarga gaz toʻldirish kompressor shoxobchalari faoliyati qisqa muddatga vaqtincha toʻxtatildi.

Shuningdek, ortadigan talabni toʻliq qondirish maqsadida avtobenzin va dizel yoqilgʻisi mahsulotlari qoʻshimcha miqdorlarda sotuvga chiqariladi, shu jumladan zaxiralar hisobidan.

“Hurmatli vatandoshlar, havo harorati keskin sovigan shu kunlarda imkon qadar jamoat transportlaridan foydalanishingizni, zarurat boʻlmaganda uyda qolishingizni hamda xonadoningizda elektr energiyasi va tabiiy gazdan tejamkorlik bilan foydalanishingizni iltimos qilamiz” deyiladi vazirlik murojaatida.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?