Kitob bilan doʻstlashgan kishi yomonliklardan yiroq boʻladi. Chunki mutolaa insonni maʼnaviy kamolatga erishtirib, jamiyatda oʻz oʻrnini topishiga xizmat qiladi. Bu insoniyat tarixida koʻp bora isbotini topgan haqiqat. Zero, doim ilm-maʼrifatga eʼtibor qaratgan jamiyat taraqqiy topgan. Ayni sabab tufayli bugun mamlakatimizda kitobxonlikka eʼtibor kuchaytrilib, bu boradagi ishlar yangi bosqichga koʻtarildi.

2021-yil 15-may kuni poytaxtimizdagi akademik F.N.Rusanov nomidagi Toshkent botanika bogʻida Artel kompaniyasi tomonidan 20 ta “Kitob uychalari”ni oʻrnatishga bagʻishlangan tadbir boʻlib oʻtdi. Unda vazirlik, idora, tashkilot vakillari hamda jurnalist, blogerlar va kitobxonlar ishtirok etdi.

Avvalo Artel kompaniyasi Boshqaruv Raisi Qobil Toshmuhammedov “Kitob uychalari”ga ramziy kitob qoʻyib berdi. Shundan soʻng, tadbirga tashrif buyurgan mehmonlar ham oʻzlari bilan olib kelgan kitoblarni “Kitob uychalari”da qoldirdi.  

Taʼkidlash kerak, ushbu loyiha shahrimiz aholisi va mehmonlar uchun kitob almashib oʻqish imkonini beradi. Yaʼni ushbu uychalardan siz oʻzingiz istagan kitobni olib mutolaa qilishingiz va oʻzingizdagi kitoblarni u yerda qoldirishingiz mumkin. Bu loyiha orqali Artel kompaniyasi xalqimizga, ayniqsa, yoshlarimizga ilm va tafakkur manbaini ulashishni niyat qilgan.   

— Kompaniyamizning maqsadi faqat ishlab chiqarish, mamlakat sanoatini rivojlantirishdan iborat emas. Balki xalqimizning intellektual salohiyatini oshirish, yuksak maʼnaviyatli, malakali kadrlarni tayyorlashda munosib hissa qoʻshish hamdir, — deydi Artel kompaniyasi Boshqaruv Raisi Qobil Toshmuhammedov. — Kelgusida ushbu loyihani davom ettirib boshqa istirohat bogʻlariga ham “Kitob uychalari”ni oʻrnatish niyatidamiz. Bu orqali kitobsevar xalqimizga mutolaa uchun qulaylik yaratib bermoqchimiz.

Darhaqiqat, jamiyatda keskin oʻzgarishlar roʻy berayotgan vaqtda davlat idoralari, tashkilot va yirik ishlab chiqarish korxonalari ilm-fanga homiylik qilishi, ularni bevosita qoʻllab-quvvatlashi kerak. Bu jahon tajribasida korporativ ijtimoiy masʼuliyat — tashkilot va korxonalar daromad olish bilan birga, jamiyat rivojiga oʻz hissasini qoʻshish, deyiladi. Aytish kerak, Artel kompaniyasi jamiyat rivoji uchun ulkan hissa qoʻshib kelyotgan yirik korxonalardan biri hisoblanadi.

Tadbir ishtirokchilari tomonidan kompaniyaning kitobxonlikni targʻib etishga qaratilgan yangi loyihasi iliq kutib oldi va uni ommalashtirishdan har bir yurtdoshimiz manfaatdor ekanini aytishdi. 

Reklama