Ar-Riyodda Oʻzbekiston — Saudiya Arabistoni Hukumatlararo komissiyasining IV yigʻilishi boʻlib oʻtdi

23:55 04 May 2021 Siyosat
399 0

Joriy yilning 4-may kuni Ar-Riyod shahrida Oʻzbekiston Respublikasi Bosh vazirining oʻrinbosari – investitsiyalar va tashqi savdo vaziri S.Umurzakov hamda Saudiya Arabistoni Podshohligi investitsiyalar vaziri Xolid al-Falih raisligida Savdo, iqtisod, investitsiyalar, texnika, madaniyat, sport va yoshlar masalalari boʻyicha Oʻzbekiston Respublikasi va Saudiya Arabistoni Podshohligi oʻrtasidagi Hukumatlararo komissiyasining IV yigʻilishi boʻlib oʻtdi.

Oʻzbekiston Respublikasi investitsiyalar va tashqi savdo vazirligi matbuot xizmati maʼlumotiga koʻra, uchrashuvda ikki mamlakatning tegishli vazirlik va idoralari rahbarlari, shuningdek, Saudiya Arabistonining yirik kompaniya va sanoat xoldinglari rahbarlari qatnashdi.

Yigʻilish kun tartibi bilan ikki tomonlama investitsiyaviy, savdo-iqtisodiy, moliyaviy-texnik, transport va logistika, madaniy-gumanitar hamkorlikning keng koʻlamli masalalari qamrab olindi.

Delegatsiyalar rahbarlari ikki mamlakat oʻrtasidagi strategik, tizimli va koʻp qirrali sheriklikni faollashtirishning jadal surʼatlarini taʼkidladilar. Bunga turli darajadagi masalalarni tahlil etish va hal qilishda oʻzaro anglashuvning yuqori darajasi, shuningdek, ikki mamlakat vazirlik va idoralarining oʻzaro manfaatli hamkorlikni izchil kengaytirish borasidagi muvofiqlashtirilgan harakatlari hisobiga erishildi.

Shu bilan birga, uzoq muddatli iqtisodiy sheriklikning barqaror mexanizmlarini yaratish zaruriyati tilga olindi. Bu ayniqsa, koronavirus pandemiyasi taʼsirida jahon iqtisodiyotida saqlanayotgan salbiy tendensiyalar roʻy berayotgan bir paytda muhimdir.

Energetika, kimyo sanoati, qishloq xoʻjaligi, qurilish materiallari ishlab chiqarish, turizm, mehmonxona biznesi, transport va logistika kabi tarmoqlarda ikki tomonlama investitsiyaviy hamkorlikning muhim ishga solinmagan imkoniyatlari mavjudligi qayd etildi. Sogʻliqni saqlash, kimyo va farmatsevtika sanoati sohalarida qoʻshma loyihalarni amalga oshirishni jadallashtirish boʻyicha ham kelishuvga erishildi.

Alohida tartibda oʻzaro savdo masalalari koʻtarildi va uni faollashtirish boʻyicha istiqbolli chora-tadbirlar koʻrib chiqildi. Shu nuqtayi nazardan, tomonlar Oʻzbekiston va Saudiya Arabistoni oʻrtasidagi savdo aylanmasining oʻsishi uchun sanoat kooperatsiyasining yangi qoʻshma loyihalari katalizator boʻla olishini taʼkidlab, bu yoʻnalishda birgalikda ishlashga tayyor ekanliklarini bildirdilar.

Moliya sohasida sheriklikni rivojlantirishga alohida eʼtibor qaratildi. Shu nuqtayi nazardan, muloqot davomida Saudiya Arabistoni taraqqiyot jamgʻarmasi (SATJ) bilan hamkorlikda erishilgan yutuqlarga toʻxtalib oʻtildi. Xususan, joriy yil boshidan buyon Jamgʻarma tomonidan umumiy qiymati 300 mln dollarga teng 10ta loyiha moliyalashtirildi. Bu boradagi hamkorlikni chuqurlashtirish istiqbollarini ijobiy baholab, tomonlar Saudiya Arabistoni investorlari va moliya institutlari orasidan Oʻzbekistonda loyihalarni amalga oshirish uchun yangi sheriklarni jalb etishda hamkorlikni yana-da kengaytirishga tayyor ekanliklarini bildirdilar.

Yigʻilish davomida Islom taraqqiyot banki koʻmagida Oʻzbekistonda Iqtisodiy qoʻllab-quvvatlash jamgʻarmasi tashkil etilishi haqida soʻz bordi. Uning vazifalariga xususiy tadbirkorlikni qoʻllab-quvvatlash, shuningdek, kambagʻallikni qisqartirish va aholi bandligini oshirish hamda iqtisodiyotning turli sohalarida investitsiya loyihalarini amalga oshirish orqali yangi ish oʻrinlari yaratish kiradi.

Shuningdek, tadbir davomida madaniy-gumanitar sohasidagi hamkorlikning ayrim masalalari muhokama qilindi. Jumladan, Oʻzbekistonda Milliy sogʻliqni saqlash tizimini modernizatsiya qilish va tarkibiga tibbiy-diagnostika, taʼlim va tadqiqot obyektlari kiruvchi tibbiy klasterlarni yaratish boʻyicha Saudiya Arabistoni tibbiyotining yetakchi kompaniyalari bilan hamkorlik qilish, turizm infratuzilmasini rivojlantirish va oʻzaro turistik oqimlarni koʻpaytirish uchun qulay shart-sharoitlar yaratish, Oʻzbekistondagi Islom sivilizatsiyasi markazi bilan Podshoh Faysal nomidagi tadqiqotlar va islomshunoslik markazi oʻrtasida hamkorlikni yoʻlga qoʻyish va boshqa bir qator masalalar koʻrib chiqildi.

Yigʻilish yakunlari boʻyicha energetika, qishloq xoʻjaligi va standartlashtirish sohasida qator ikki tomonlama hujjatlar, shuningdek, koʻp qirrali Oʻzbekiston – Saudiya Arabistoni hamkorligini oʻrta va uzoq muddatli istiqbolda rivojlantirishning asosiy yoʻnalishlarini aks ettiruvchi yakuniy bayonnoma imzolandi.

“Xalq soʻzi”.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?