Illyustrativ foto

Polshaning Fransiyadagi elchisi Yan Emerik Rostsishevskiy LCI telekanali efirida Rossiya bilan ziddiyatga kirishish shartini aytib oʻtdi. Unga koʻra, agar Kiyev magʻlub boʻlsa, bu sodir boʻladi.

“Agar Ukraina oʻz mustaqilligini himoya qila olmasa, bizda mojaroga kirishishdan boshqa iloj qolmaydi”, deydi diplomat.

Rostsishevskiyning qoʻshimcha qilishicha, Ukrainadagi qarama-qarshilik Gʻarbning asosiy qadriyatlari va madaniyati uchun kurashdir, shuning uchun uning fikricha, gʻalaba juda muhim.

Avvalroq Polsha prezidenti Anjey Duda Varshava Kiyevga bir nechta MiG-29 qiruvchi samolyotlarini topshirishini aytgan edi. Uning soʻzlariga koʻra, bular ish holatidagi toʻrtta samolyotdir.

Bungacha Polsha rasmiylari Ukraina tomoniga qiruvchi samolyotlar yetkazib berish imkoniyatini eʼlon qilgan edi. Shu bilan birga, transfer faqat NATOning boshqa davlatlari bilan koalitsiyada amalga oshirilishi mumkinligi qayd etilgan.

Oʻz navbatida, Federatsiya Kengashi (Rossiya Federatsiyasi Federal Majlisining yuqori palatasi) aʼzosi, senator Aleksey Pushkov Polsha elchisining Rossiya bilan jang qilishga tayyorligi haqidagi soʻzlariga javob qaytardi.

Pushkovga koʻra, Polsha Rossiyaga qarshi faqat AQSH koʻmagi bilan kurashishga tayyor. Shu oʻrinda u diplomatning bayonotini “juda takabburlik” deb atadi.

“Birinchi marta Polsha rasmiy vakilining tili bilan uning rahbarlarining uzoq vaqtdan beri xayolidagi gap aytildi. Biroq, polyaklarning barcha «jasorati” AQSHning qoʻllab-quvvatlashiga asoslangan», deya xulosa qildi Federatsiya Kengashi vakili.