Bu haqda AOKAda oʻtkazilgan brifingda Ekologiya va atrof-muhitni muhofaza qilish davlat qoʻmitasi boshqarma boshligʻi Azizjon Kalimbetov maʼlum qildi:

— 2023-yilgacha boʻlgan Atrof-muhitni muhofaza qilish Konsepsiyasi doirasida jamoat transportining kamida 50 foizini gaz-ballon yoqilgʻi, elektr va boshqa muqobil yoqilgʻi turlariga oʻtkazish belgilangan.

Joriy yilning oʻtgan davrida respublikada foydalanishdagi 3 milliondan ortiq avtotransport vositasining 60 foizi gaz yoqilgʻisida harakatlanishga moʻljallangan.

Transport vositalaridan atmosferaga tashlamalarni kamaytirish va meʼyor darajasida ekanini aniqlash maqsadida joriy yilning bahor mavsumida “Toza havo” tadbirining birinchi bosqichi oʻtkazildi.

Tadbir davomida 120 mingdan ortiq transport vositasi koʻrikdan oʻtkazilib, ularning qariyb 5 mingtasi belgilangan meʼyorlardan ortiq ekani aniqlandi va ularning 1,5 mingga yaqini vaqtincha toʻxtatilishi evaziga atmosferaga kuniga oʻrtacha 80 tonna zararli moddalar tashlanishining oldi olindi. Hozirda, tadbirning 2-bosqichi — 10-avgustdan 10-sentyabrgacha boʻlib oʻtmoqda».