Avstriya poytaxti Vena shahrida oʻtayotgan xalqaro tadbirlar doirasida Oʻzbekiston Respublikasi Prezidenti yordamchisi Saida Mirziyoyeva ushbu shaharda joylashgan nufuzli xalqaro tashkilotlarda faoliyat yuritayotgan vatandoshlarimiz bilan uchrashuv oʻtkazdi.

Uchrashuv davomida Saida Mirziyoyeva xorijda mehnat qilayotgan oʻzbekistonlik mutaxassislarning mamlakatimiz obroʻsini yuksaltirishdagi roliga alohida toʻxtalib oʻtdi.

“Ular oʻz mehnati, bilimi va masʼuliyatliligi bilan kun sayin mamlakatimizga boʻlgan ishonchni yuksaltirib kelmoqda. Vatandan uzoqda boʻlishlariga qaramay, Oʻzbekiston bilan mustahkam aloqani saqlab qolayotganlari ayniqsa tahsinga loyiq”, — dedi u.

Saida Mirziyoyeva bu kabi uchrashuvlar har safar oʻzgacha faxr tuygʻusini uygʻotishini hamda yurtdoshlarimizning global vazifalar yechimida faol ishtirok etayotganini koʻrish kishini ruhlantirishini bayon qildi.

Shuningdek, u davlat tomonidan bunday iqtidorli kadrlar tizimli ravishda ragʻbatlantirilishini qayd etdi:

“Bunday malakali mutaxassislar safi yanada kengayishi juda muhim. Biz xalqaro tajriba orttirishni, professional jihatdan oʻsishni, vatanimiz hamda jahonga naf keltirishni istaydigan yosh oʻzbekistonliklarni doimo qoʻllab-quvvatlaymiz”.

Ushbu uchrashuv Oʻzbekistonning xorijdagi vatandoshlar va yuqori potensialli yosh kadrlar bilan ochiq muloqotni rivojlantirish hamda ularning salohiyatidan mamlakat islohotlarida foydalanish borasidagi izchil siyosatining uzviy davomi hisoblanadi.