Joriy hafta davomida Qashqadaryo viloyatidagi ommaviy axborot vositalari xodimlari, matbuot kotiblari, blogerlar, SMM menejerlar hamda sohaga qiziquvchi yoshlarni bir joyga jamlagan yirik tadbir – “Media haftalik” oʻz yakuniga yetdi.

Oʻzbekiston Respublikasi Prezidenti Administratsiyasi huzuridagi Ommaviy axborot vositalari uchun kontent tayyorlash markazi tashabbusi bilan tashkil etilgan ushbu tadbirda ishtirokchilar beshta asosiy yoʻnalish boʻyicha oʻqitildi. Mashgʻulotlarda maʼlumotlarni, axborotlarni olish, tahlil qilish va tayyorlash, sunʼiy intellekt bilan ishlash, faktcheking, raqamli etika va maʼlumotlarni vizuallashtirish va shu kabi qator mavzularda tajribali mutaxassislar tomonidan chuqur bilimlar berildi. Oʻzaro tajriba, fikrlar almashildi, takliflar oʻrtaga tashlandi.

— Bugun barcha sohalarda boʻlgani kabi, maʼlumotlar, axborotlarni tayyorlash sohasida ham zamonaviylashuv jarayonlari kechmoqda, — deydi Sanepidqoʻmitaning Qashqadaryo viloyat boshqarmasi axborot xizmati rahbari Sobir Narziyev. — Mashgʻulotlarda matn, foto va video materiallar bilan ishlash, sohada qoʻllanilayotgan koʻplab zamonaviy dasturlar va ularning imkoniyatlari haqida yangi bilimlarni oʻzlashtirdik.

Yangi xabarni olish va uzatishda tezkorlik muhimmi yoki uning toʻgʻriligi? OAVning salohiyati uning koʻp axborot uzatishida koʻrinadimi yoki sifatli axborot berishida? Telereportajlarni tayyorlashda nimalarga eʼtibor qaratish kerak? Tasvirlarni montaj qilishda hozir qaysi dasturlar eng samarali? Jahondagi eng mashhur SMM menejerlarning yutugʻi nimada?

Oʻquv mashgʻulotlarida ishtirokchilar bu boradagi savollarga ham nazariy, ham amaliy tomondan aniq va asosli javoblar olishdi.

Mashgʻulotlar yakunida barcha ishtirokchilarga tegishli sertifikatlar topshirildi.

Maʼlumot oʻrnida: “Media haftalik” loyihasi shu kunga qadar Qoraqalpogʻiston Respublikasi, Xorazm hamda Surxondaryo viloyatlarida oʻtkazilgan edi. Qashqadaryo viloyati esa bu boradagi toʻrtinchi hudud boʻldi.

Jahongir BOYMURODOV, “Xalq soʻzi”.