Namangan viloyatining Uchqoʻrgʻon tumanida yengil sanoat ishlab chiqarishi sohasida yana bir yirik loyiha amalga oshirilib, “UZTEX GROUP” kompaniyasi negizida “Uchqoʻrgʻon tekstil” korxonasi barpo etildi.

Uchqoʻrgʻon Namanganning sanoat jadal rivojlanib borayotgan tumanlaridan biri. Bugungi kunda tumanda yengil sanoat, oziq-ovqat ishlab chiqarishi, meva-sabzavotni qayta ishlash, qurilish ashyolari va yoʻnalishlarda “Uchqoʻrgʻon Cotton Textile”, “Namangan Agro Export”, “Uchqoʻrgʻon Yogʻ-Moy” korxonasi – oʻsimlik yogʻi ishlab chiqarish, “Uchqoʻrgʻon Qurilish Materiallari”, “Fargʻona Valley Textile Cluster”, “Agro Fresh Uchqoʻrgʻon”, “Uchqoʻrgʻon Non Kombinati”, “Baraka Savdo Sanoat” singari yuzlab yirik va kichik tadbirkorlik yoʻnalishidagi korxonalar faoliyat koʻrsatmoqda. “Uchqoʻrgʻon tekstil” ning ishga tushirilishi bilan tumanda zamonaviy korxonalar soni yana bittaga koʻpaydi va u nafaqat tuman, balki viloyat iqtisodiy salohiyatida ham muhim ahamiyat kasb etadi.

“Uchqoʻrgʻon tekstil” korxonasida ilgʻor texnologiyalar asosida jahon bozorida talab yuqori boʻlgan denim (jinsi) matosi uchun uchta kalava ipni birlashtirib, mahsulot turlarini kengaytirish, sifatni oshirish va xalqaro bozorda raqobatbardoshlikni mustahkamlashga xizmat qiladigan toʻqimachilik xom ashyosini ishlab chiqarish yoʻlga qoʻyildi.

Eʼtiborlisi, 10 million dollar sarmoya kiritilgan ushbu loyiha ishga tushirilishi bilan 270 ta yangi ish oʻrni yaratilib, tuman yoshlari, xotin-qizlaridan shuncha nafari doimiy ish, barqaror daromad manbai bilan taʼminlandilar.

- Tumanimizda korxonalar yil sayin koʻpayib borayotgani bois ish qidirib, viloyat markazlariga borishning ham hojati qolmayapti, — deydi Sohil mahallasida yashovchi Barchinoy Abdullayeva, — toʻqimachilik korxonalari ayniqsa biz kabi yosh ayollar uchun ayni muddao. Men ham “Uchqoʻrgʻon tekstil” korxonasiga ishga joylashdim va bundan juda xursandman.

-Korxonada ishlovchilar uchun zamonaviy andozalarda qulay mehnat sharoitlari, ijtimoiy muhofaza tizim yaratilgan, — “Uchqoʻrgʻon tekstil” korxonasining ishlab chiqarish boʻyicha direktori Umar Hayat — Jumladan, tibbiy xizmat, bepul tushlik, olis qishloqlardan qatnab ishlovchilarni ishga olib borib kelish uchun transport xizmati kabilar tashkil qilingan. Bu, albatta, mehnat unumdorligini oshirish va ishchi-xizmatchilar farovonligini oshirishda muhim ahamiyat kasb etadi.

Akramjon Sattorov, “Xalq soʻzi”.