Asrlar davomida shakllangan boy madaniy merosimiz rassomlarimizning milliy ruh bilan sugʻorilgan rangtasvir asarlarida dunyoga namoyish qilib kelinmoqda. Chunki oʻzbek sanʼati — bu shunchaki tasvir yoki rangboʻyoq emas, balki xalqimizning tarixi, orzu-umidlari, sabr-bardoshi va Vatanga boʻlgan muhabbatining yorqin ifodasidir.

Shu jihatdan ijodkorga oʻzi tugʻilib oʻsgan muqaddas zamin ilhom manbai. Chinakam rassom oʻz yurtini sevmasa, uning tabiatini, odamlarini, qadriyatlarini his etmasa, u qalbga yetib boradigan asarlar yarata olmaydi. Oʻzbekiston zaminida yetishib chiqqan koʻplab rassomlarning dunyoga tanilishida jonajon yurtiga boʻlgan mehr-muhabbati asosiy rol oʻynagan desak mubolagʻa qilmagan boʻlamiz.

Taniqli rassom Akmal Nur oʻz asarlarida milliylik va zamonaviylik uygʻunligini yarata olgan ijodkor sifatida alohida eʼtirofga sazovor. Uning rangtasvir yoʻnalishidagi asarlarida sharqona falsafa, inson qalbining chuqur kechinmalari va Vatanga boʻlgan sadoqat aks etib turadi. Rassom asarlariga nazar tashlar ekansiz, goʻyoki tarix va bugungi kun oʻrtasidagi nurli bir koʻprikni his qilganday boʻlasiz. Bu esa sanʼat orqali vatanparvarlik tuygʻusini uygʻotishning yorqin namunasidir.

Yana bir mahoratli ijodkor Ortiqali Qozoqov ham oʻzbek tasviriy sanʼatini yuksak pogʻonaga koʻtargan rassomlardan hisoblanadi. Uning asarlarida xalqimizning mehnatsevarligi va milliy gʻururi yaqqol namoyon boʻladi. Qozoqov yaratgan manzaralar va obrazlar nafaqat koʻzni quvontiradi, balki qalbda faxr tuygʻusini uygʻotadi. Chunki bu asarlarda Vatan nafasi bor, yurt taqdiriga daxldorlik hissi mujassam.

Oʻzbek rassomlarining yutugʻi— bu faqat sanʼatdagi muvaffaqiyat emas, balki asarlarga koʻchgan milliy oʻzlikdir. Chunki har bir asar ortida tarixini unutmagan, kelajagiga ishongan xalq qiyofasi gavdalanadi. Bugun dunyo muzeylari va koʻrgazmalarida rassomlarimiz asarlarining keng namoyish etilayotgani Yangi Oʻzbekistonning madaniy qudrati tobora yuksalib borayotganidan dalolat beradi.

Vatanparvarlik mavzusi sanʼatda ayniqsa muhim. Shu mavzudagi bir kartina butun boshli kitob ayta olmagan fikrni odamlarga yetkazishi mumkin. Muhimi, moʻyqalam sohiblari oʻz asarlari orqali yosh avlodni jonajon yurtimizni sevishga, koʻz qorachigʻidek asrashga va tinchlik qadrini chuqur anglashga doim undab turadi.

Farxod AZIMOV,

Kamoliddin Behzod nomidagi milliy rassomlik va dizayn instituti talabasi