Namangan viloyati Davlatobod tumanidagi 48-sonli umumtaʼlim maktabida “Kelajak soati” doirasida navbatdagi maʼnaviy-maʼrifiy dars tashkil etildi. Mazkur mashgʻulotda maktabgacha va maktab taʼlimi vaziri Eʼzoza Karimova ishtirok etib, “Muqaddas ayol” mavzusida oʻquvchilar bilan ochiq muloqot oʻtkazdi.

Dars davomida bugungi kunda mamlakatimizda ayol-qizlarga qaratilayotgan yuksak eʼtibor, ularning huquq va manfaatlarini taʼminlash, taʼlim olishi, kasb-hunar egallashi hamda jamiyat hayotidagi faolligini oshirish borasida amalga oshirilayotgan keng koʻlamli islohotlar haqida atroflicha soʻz yuritildi. Oʻquvchilar oʻz fikr-mulohazalari, orzu-intilishlari bilan faol ishtirok etib, mavzu yuzasidan teran va hayotiy qarashlarini bildirdi.

Vazir yoshlarning bilim olishga boʻlgan intilishi, mustaqil fikrlashi va kelajakka ishonch bilan qarayotganini alohida eʼtirof etdi.

Tadbir doirasida maktab pedagogik jamoasi bilan ham uchrashuv oʻtkazildi. Unda taʼlim sifatini oshirish, oʻquvchilarning bilim darajasini yanada yuksaltirish, zamonaviy pedagogik yondashuvlarni keng joriy etish masalalari muhokama qilindi.

Uchrashuv yakunida maktab hududida “Yashil makon” umummilliy loyihasi doirasida daraxt koʻchatlari ekilib, atrof-muhitni asrash va yashil hududlarni kengaytirish borasidagi ezgu tashabbus qoʻllab-quvvatlandi.

Taʼkidlanganidek, bu kabi uchrashuvlar yoshlarning taʼlimga boʻlgan qiziqishini oshirish, ularni qoʻllab-quvvatlash hamda fikr-mulohazalarini oʻrganishda muhim ahamiyat kasb etadi.