Sogʻliqni saqlash vaziri Asilbek Xudayarov boshchiligidagi delegatsiya Mozori Sharif shahrida Afgʻoniston Sogʻliqni saqlash vaziri Mavlavi Nur Jalol, Balx viloyati gubernatori Muhammad Yusuf Vafo hamda boshqa masʼullar bilan uchrashdi.

Afgʻoniston vaziri davlatlarimiz oʻrtasidagi yaqin qoʻshnichilik munosabatlari gumanitar yoʻnalishda, xususan, sogʻliqni saqlash sohasida hamkorlikni kengaytirish uchun asos boʻlishini taʼkidladi.

Bugun Afgʻonistonning aksariyat tumanlarida shifoxonalar yoʻq. Keyingi yillarda mamlakatda saraton kasalligi aniqlangan bemorlar nisbatan koʻpaygan.

Shundan kelib chiqib, mezbon tomoni Oʻzbekistondan Mozori Sharifda shifoxona qurish, mutaxassislar tayyorlash va malakasini oshirish, afgʻonistonlik bemorlarning yurtimizda davolanishi uchun tibbiy viza berish tartiblarini soddalashtirish, dori vositalarini olish jarayonlarini yengillashtirishda koʻmak berish imkoniyatlarini koʻrib chiqishni soʻradi.

Balx viloyati gubernatori Afgʻonistonning ogʻir kunlarida, ayniqsa, tabiiy ofat, sel toshqinlarida Oʻzbekiston Prezidenti Shavkat Mirziyoyev afgʻon xalqining yonida boʻlganini, doimo qoʻllab-quvvatlab kelayotganini mamnuniyat bilan taʼkidladi.

Muhammad Yusuf Vafo Oʻzbekiston koʻmagida Jahon sogʻliqni saqlash tashkiloti rahbarining joriy yil Afgʻonistonga tashrifini tashkil etish rejalashtirilganini yuqori baholadi.

Oziq-ovqat va dori vositalari nazorati boshqarmasi boshligʻi Hamidulloh Zohid Oʻzbekistonda ishlab chiqarilayotgan dori vositalari uchun bugun Afgʻonistonda katta bozor mavjudligini taʼkidlar ekan, ularni roʻyxatdan oʻtkazish jarayonini yanada osonlashtirishni taklif qildi.

Mamlakatimiz delegatsiyasi Dehdadi tumani poliklinikasi hamda Mozori Sharifdagi Abu Ali Ibn Sino nomli markaziy shifoxona faoliyati bilan tanishdi va xodimlar bilan muloqot oʻtkazdi.

Tashrif davomida quyidagi kelishuvlarga erishildi:

Afgʻonistondagi davlat tibbiyot muassasalariga koʻmaklashish imkoniyatlarini oʻrganish va tegishli takliflar tayyorlash uchun har ikkala vazirlik vakillaridan iborat ishchi guruh tuzish;

qoʻshni davlat delegatsiyasining yurtimizga tashrifini tashkil etish;

har yili 100 nafargacha Afgʻoniston mutaxassislarining respublika ixtisoslashtirilgan tibbiyot markazlarida malaka oshirishini yoʻlga qoʻyish;

yiliga 50 nafargacha afgʻon yoshlarining respublika tibbiyot oliy oʻquv yurtlarida grant asosida tahsil olishi uchun kvota ajratish masalasini koʻrib chiqish;

qoʻshni davlatdagi ogʻir bemorlarning yurtimizga davolanishga kelishi uchun tibbiy viza berish jarayonini yengillashtirish masalasini mutasaddi tashkilotlar bilan kelishish va natijasini afgʻon tomoniga yetkazish;

“Arman Group” kompaniyasi bilan hamkorlikda Mozori Sharif shahrida davlat-xususiy sheriklik asosida shifoxona barpo etish. Bunda afgʻon tomoni loyihaga investitsiya kiritadi, mavjud binoni shifoxonaga moslashtiradi va ilgʻor tibbiy jihozlarni xarid qiladi. Oʻzbekiston tomoni muassasani yetuk mutaxassislar bilan taʼminlaydi.

Umuman, ushbu tashrif Oʻzbekiston va Afgʻonistonning sogʻliqni saqlash sohasidagi hamkorligida yangi davrni boshlab berishi, shubhasiz.