Oliy Majlis Qonunchilik palatasidagi “Milliy tiklanish” demokratik partiyasi fraksiyasining navbatdagi yigʻilishida dastlab Prezidentimizning Surxondaryo viloyatiga tashrifining ahamiyati xususida toʻxtalib oʻtildi.

Ushbu masalada mazkur hududdan saylangan deputat Abdulhakim Eshboyev soʻzga chiqib, davlat rahbarining viloyatga tashrifi kutilganidan ham samarali boʻlganini taʼkidladi. Jumladan, buning isbotini viloyatda umumiy qiymati 7,1 milliard dollar boʻlgan 13 ta loyihaning ishga tushirilgani hamda 31 ta loyihaga start berilganidan ham koʻrish mumkin.

— Eng asosiysi, ushbu loyihalarning amalga oshirilishi natijasida 18 mingta yangi ish oʻrni yaratiladi, — dedi deputat.

Shundan soʻng kun tartibidagi asosiy masala — fraksiya aʼzolarining saylov okruglaridagi uchrashuvi masalasi muhokama qilindi.

Taʼkidlanganidek, 26-28-fevral kunlari fraksiya aʼzolari mahalliy Kengash deputatlari hamrohligida hududlarda boʻlib, fuqarolar bilan sayyor qabul, yuzma-yuz muloqotlar oʻtkazdi. “Deputat qabul”lari tashkil etildi, yoshlar bilan ochiq muloqotlar oʻtkazildi. “Tarbiya” fani darsligining oʻqitish holati nazorat-tahlil tartibida oʻrganildi. Saylovchilar qonunchilikdagi soʻnggi yangiliklar bilan tanishtirildi, takliflari qabul qilindi. Aniqlangan muammo va fuqarolar murojaatlarida koʻtarilgan masalalarni joyida hal etish boʻyicha chora-tadbirlar belgilandi.

Fraksiya aʼzolari okruglardagi faoliyati davomida jami 299 ta obyektda oʻrganishlar olib borib, joylarda aholi bilan 229 ta uchrashuv oʻtkazildi. Uchrashuvlarda saylovchilar tomonidan jami 199 ta masala koʻtarilgan boʻlib, shundan 138 tasi tuman va shahar, 30 tasi viloyat hamda 19 tasi respublika darajasidagi masalalardir.

Yigʻilishda eng koʻp masala taʼlim, sogʻliqni saqlash, fuqarolarning oʻzini oʻzi boshqarish organlari faoliyati hamda transport va yoʻl qurilishi sohalariga toʻgʻri kelgani qayd etildi. Fraksiya aʼzolari tomonidan amalga oshirilgan chora-tadbirlar natijasida aholi tomonidan koʻtarilgan 199 ta masaladan 59 tasi, yaʼni 29,6 foizi joyida hal etilgani urgʻulandi.

Deputatlarning joylarda oʻtkazgan uchrashuvlari natijasida taʼlim, sogʻliqni saqlash, kommunal xoʻjalik va madaniy meros sohalarida respublika darajasida hal etilishi lozim boʻlgan muammolar aniqlangani aytildi. Xususan, Qorakoʻl tumanidagi 3-sonli umumtaʼlim maktabida oʻquvchilar soni meʼyordan ortiq boʻlib, qoʻshimcha 330 oʻrinli bino qurish zarurati mavjud. Dehqonobod tumanidagi 13-maktab binolarining jismoniy eskirgani sababli rekonstruksiya qilish masalasi koʻtarildi. Qashqadaryo viloyati Qarshi shahrida esa pedagoglar tomonidan “Tarbiya” fanining darsliklarini qayta tahrirlashga ehtiyoj borligi maʼlum qilindi.

Madaniy meros sohasida Navoiy viloyati Navbahor tumanidagi “Sarmishsoy” qoyatosh rasmlari va “Uchtut” tarixiy maskanini asrash hamda respublika va xalqaro muhofaza roʻyxatlariga kiritish masalalari respublika darajasida koʻrib chiqishni talab etmoqda. Shuningdek, Fargʻona shahridagi 2-oilaviy poliklinikada zamonaviy raqamli rentgen uskunasi yetishmasligi tibbiy xizmat sifatini pasaytirayotgani taʼkidlandi.

Yigʻilishda murojaatlar bilan ishlashda samaradorlikni taʼminlash, qonunchilikka takliflar olib kelish zarurligi taʼkidlandi.