Oliy Majlis Senatining Mudofaa va xavfsizlik masalalari qoʻmitasi hamda xalq deputatlari Yangihayot tuman Kengashining qoʻshma majlisi boʻlib oʻtdi.

Majlisda tumanda huquqbuzarliklar profilaktikasi, jinoyatchilik va korrupsiyaga qarshi kurashish borasida amalga oshirilayotgan ishlar samaradorligi atroflicha muhokama qilindi. Shuningdek, tuman hokimi, prokurori hamda ichki ishlar organlari faoliyatini muvofiqlashtirish boshqarmasi rahbarlarining axborotlari eshitildi.

Yigʻilishda Davlat rahbarining PQ–1 va PQ–2-sonli qarorlari ijrosiga alohida eʼtibor qaratildi. Ushbu qarorlar doirasida 2026-yilning oʻtgan davrida tuman mahallalarida 18 ta “xavfsiz koʻcha” va 13 ta “xavfsiz uy” barpo etilgani qayd etildi.

Shuningdek, bugungi kunda 206 ta maishiy va savdo obyektlari hamda 263 ta xonadon texnik jihatdan qoʻriqlovga olingani, bundan tashqari, koʻp qavatli uylarning kirish eshiklariga 150 ta domofon, kirish yoʻlaklariga 106 ta “tashvish tugmasi” oʻrnatilgani alohida taʼkidlandi.

Amalga oshirilgan chora-tadbirlar natijasida 2026-yilning birinchi choragida oila-turmush nizolari oqibatida jinoyat sodir etilishiga yoʻl qoʻyilmadi. Shuningdek, oldini olish mumkin boʻlgan jinoyatlar soni 8,8 foizga kamaydi.

Jinoyat turlari boʻyicha ham ijobiy natijalar qayd etildi. Xususan, qotillik, oʻgʻirlik, transport vositasini olib qochish, ogʻir tan jarohati yetkazish kabi jinoyatlar hamda oʻlim bilan bogʻliq yoʻl-transport hodisalari soni kamaygan.

Ichki ishlar organlari tashabbusi bilan aniqlanadigan jinoyatlar 34,9 foizga oshgani qayd etildi. Mahallalar kesimida tahlil qilinganda 30 ta mahallaning 7 tasida jinoyatlar kamaygan, 21 tasida esa umuman jinoyat sodir etilmagan.

Mazkur natijalar hududda jamoat xavfsizligini taʼminlash va jinoyatchilikning oldini olish borasida tizimli ishlar amalga oshirilayotganini koʻrsatadi.

Muhokamalar yakunida tegishli qaror qabul qilinib, belgilangan vazifalar ijrosini taʼminlash yuzasidan aniq chora-tadbirlar rejasi tasdiqlandi.