2025-2026 oʻquv yili boshiga kelib Oʻzbekistonda faoliyat yuritayotgan oliy taʼlim tashkilotlari soni 215 tani tashkil etgan. Ularning soni avvalgi oʻquv yili boshiga nisbatan 7 taga kamaygan. Nodavlat oliy taʼlim tashkilotlari soni esa 97 tani tashkil qilgan. Bu haqida Taʼlim xabarlari Telegram-kanali maʼlumot berdi.

Bildirilishicha, yurtimizdagi oliy taʼlim tashkilotlarida tahsil olayotgan talabalar soni 1 million 535 ming nafar (oʻtgan yilga nisbatan 102,2 ming nafarga yoki 7,1 foizga koʻp), professor-oʻqituvchilar soni esa 54,9 ming nafarni tashkil etadi.

Maʼlumotlarga koʻra, hududlar kesimida eng koʻp oliy taʼlim tashkiloti Toshkent shahrida faoliyat yuritmoqda. Poytaxtda 98 ta OTM mavjud boʻlib, bu respublikadagi jami oliy taʼlim muassasalarining 45,6 foiziga teng hisoblanadi.

Keyingi oʻrinlarda Toshkent viloyati (19 ta) va Samarqand viloyati (14 ta) qayd etilgan. Eng kam koʻrsatkich esa Sirdaryo viloyatida kuzatilib, hududda 3 ta oliy taʼlim tashkiloti faoliyat yuritmoqda. Shuningdek, nodavlat oliy taʼlim tashkilotlarining eng koʻp soni Toshkent shahrida (56 ta), Buxoro va Toshkent viloyatlarida (har birida 7 tadan) qayd etilgan. Eng past koʻrsatkichlar esa Jizzax, Namangan viloyatlari va Qoraqalpogʻiston Respublikasida (har birida 2 tadan) kuzatilgan.

OTMlarda tahsil olayotgan talabalarning 782,9 ming nafarini qizlar, 752,1 ming nafarini esa yigitlar tashkil qilgan. Eng koʻp talabalar Toshkent shahrida tahsil olmoqda. Poytaxtdagi talabalar soni 579,3 ming nafarga yetgan boʻlib, bu respublikadagi jami talabalarning qariyb 38 foiziga tengdir.

2025-yilda oliy taʼlim tashkilotlarini 225,9 ming nafar talaba tamomlagan. Bu koʻrsatkich 2024-yilga nisbatan 7 foizga koʻpdir. Shuningdek, professor-oʻqituvchilar sonida ham oʻsish kuzatilgan. Jumladan, 2025-2026 oʻquv yili boshiga OTMlarda 54,9 ming nafar professor-oʻqituvchi faoliyat yuritmoqda.