Sogʻliqni saqlash vazirligi sohadagi masʼul xodimlarni soxta topshiriqlarga ishonmaslikka chaqirib, ogohlantirish eʼlon qildi.

Qayd etilishicha, soʻnggi vaqtlarda ijtimoiy tarmoqlar, jumladan, Telegram messenjerida ochilgan feyk akkauntlar orqali yuqori turuvchi idoralar rahbarlari nomidan soha masʼullariga soxta xabarnomalar yuborish holatlari uchramoqda.

Xususan, oxirgi paytlarda Sogʻliqni saqlash vazirligi rahbariyati nomidan yaratilgan ana shunday soxta profillar orqali tizimdagi masʼul xodimlarga turli yolgʻon va noqonuniy topshiriqlar berilmoqda.

Bildirilishicha, ushbu soxta akkauntlar orqali turli iltimoslar, topshiriqlar, pul yoki shaxsiy maʼlumot soʻrash kabi xatti-harakatlar kuzatilmoqda.

Shu oʻrinda vazirlik barcha rahbarlarni ogohlikka chaqirib, bunday feyk maʼlumotlarga ishonmaslikni, axborot xavfsizligini taʼminlashga yanada jiddiy eʼtibor qaratishlarini soʻragan.

Taʼkidlanishicha, ushbu soxta profillarni aniqlashning bir necha usuli boʻlib, ulardagi barcha maʼlumotlar yopiq va yozishmalar yangidan boshlanadi. Shuningdek, mazkur akkauntlarga video va audio qoʻngʻiroqlarni amalga oshirib boʻlmaydi.

“Agar siz shunday holatlarga duch kelsangiz, zudlik bilan Ichki ishlar vazirligi Kiberxavfsizlik markaziga murojaat qiling”, deyiladi vazirlik xabarida.