26:T728,

Urgut tumanida “Besh tashabbus olimpiadasi” doirasida sportning futbol va mini-futbol turlari boʻyicha oʻtkazilgan Davlat xavfsizlik xizmati kubogi musobaqasining tuman bosqichi gʻoliblari aniqlandi.

Algar mahallasidagi futbol oʻyingohida boʻlib oʻtgan taqdirlash marosimida soʻz olganlar sportni rivojlantirish, yoshlarni sogʻlom turmush tarziga keng jalb etish va sportni yanada ommalashtirish borasida amalga oshirilayotgan ishlar haqida soʻz yuritdilar. Tadbir davomida musobaqalarda faol ishtirok etib, yuqori natijalarga erishgan jamoalar va sportchilar munosib taqdirlandilar.

Tadbirning badiiy qismida gala-konsert dasturi koʻtarinki ruhda tashkil etildi. Taniqli estrada xonandalarining dilbar taronalari yigʻilganlarga bayramona kayfiyat ulashdi.

Sport va sanʼat uygʻunligida oʻtgan ushbu shukuhli tadbir yoshlarni sogʻlom turmush tarziga amal qilishga, jismoniy faollikni oshirishga hamda sport bilan muntazam shugʻullanishga undashga xizmat qildi. Mazkur musobaqa nafaqat gʻoliblarni aniqlash, balki yoshlar oʻrtasida doʻstlik, hamjihatlik va vatanparvarlik tuygʻularini mustahkamlashga ham munosib hissa qoʻshdi.

Tadbir davomida yaratilgan bayramona muhit, gʻoliblarni taqdirlash marosimi hamda sanʼatkorlarning chiqishlari tomoshabinlarda katta taassurot qoldirdi. Ayniqsa, yoshlar va sport ixlosmandlari uchun tashkil etilgan ushbu tantana barchaga koʻtarinki kayfiyat ulashib, sportning inson hayotidagi oʻrni va ahamiyatini yanada keng targʻib etishga xizmat qildi.

Abdulaziz YOʻLDOSHEV, “Xalq soʻzi”.