Oʻzbekiston va Qozogʻiston xalq artisti Farrux Zokirovning qutlugʻ 80-yillik yubileyi mamlakatimizda keng miqyosda nishonlandi. Mashhur sanʼatkor “Buyuk xizmatlari uchun” ordeni bilan taqdirlandi. Shuningdek, uning boy ijodiy merosini yanada chuqur oʻrganish va targʻib etishga qaratilgan davlatimiz rahbarining qarori qabul qilindi.

Bu eʼtibor sanʼatkorning milliy madaniyatni rivojlantirish va mintaqada maʼnaviy aloqalarni mustahkamlashga qoʻshgan salmoqli hissasining yuksak eʼtirofi boʻldi.

Ushbu voqea xalqaro miqyosda ham oʻz aksini topdi: Farrux Zokirov Qozogʻiston Respublikasining davlat mukofoti — II darajali “Dostыq” ordeni bilan taqdirlandi.

Shu munosabat bilan Toshkentdagi Qozogʻiston elchixonasida tantanali marosim boʻlib oʻtdi. Unda Qozogʻiston Respublikasining Oʻzbekistondagi Favqulodda va Muxtor Elchisi Beybut Atamkulov Qozogʻiston Respublikasi Prezidenti Qasim-Jomart Toqayev nomidan “Yalla” afsonaviy ansambli badiiy rahbariga yuksak mukofotni topshirdi.

“Dostыq” ordeni sanʼatga bagʻishlangan koʻp yillik mehnat hamda Markaziy Osiyo xalqlari oʻrtasida madaniy hamkorlikni mustahkamlashga qoʻshilgan salmoqli hissaning yorqin dalili boʻldi.

Yubiley munosabati bilan yoʻllangan tabrik maktubida Qozogʻiston davlat rahbari sanʼatkor ijodining birlashtiruvchi qudratini alohida taʼkidladi:

“Tabiiy isteʼdodingiz, soʻnmas hayotiy gʻayratingiz va noyob mehnatsevarligingiz tufayli Siz butun dunyo boʻylab millionlab muxlislarning samimiy muhabbatiga sazovor boʻldingiz. Sizning sanʼatingiz koʻp yillar davomida turli avlod va xalqlarni birlashtirib kelmoqda. Qozogʻistonda Sizni betakror ovozingiz va “Yalla” ansambli ijrosidagi mashhur qoʻshiqlaringiz uchun yuksak qadrlashadi”.

Farrux Zokirov nomi musiqa madaniyati tarixida alohida oʻrin egallab, turli avlod va xalqlarni bogʻlovchi ramzga aylangan.

Javob soʻzida yubilyar Qozogʻiston Prezidentiga yuksak eʼtibor uchun samimiy minnatdorlik bildirdi. Uning taʼkidlashicha, mazkur mukofot nafaqat katta sharaf, balki Oʻzbekiston va Qozogʻiston oʻrtasidagi mustahkam madaniy aloqalarning yana bir tasdigʻidir.

Nurlan USMONOV, “Xalq soʻzi”.