AQSH Prezidenti Donald Tramp Isroil Bosh vaziri Binyamin Netanyahu bilan telefon orqali suhbat chogʻida uning Yaqin Sharqdagi harakatlarini haqoratli soʻzlar bilan keskin tanqid qildi, deb xabar bermoqda Axios.

Portal suhbatdoshlarining taʼkidlashicha, Tramp Netanyahuni “telba” deb atagan va bosh vazirga ilgari koʻrsatgan yordamlarini eslatib oʻtgan.

“Agar men boʻlmaganimda, sen qamoqda oʻtirgan boʻlarding. Hozir esa hamma seni yomon koʻradi. Buning kasofatiga hamma Isroilni yomon koʻrib qoldi”, — degan Amerika yetakchisi telefon muloqotida.

AQSH Prezidenti yahudiy davlati bosh vaziriga korrupsiya ishi boʻyicha qamoq jazosidan qochishiga bevosita yordam berganini ochiq aytgan va Livanga berilayotgan zarbalar oqibatida Isroil xalqaro maydonda yanada kattaroq yakkalanib qolishini bashorat qilgan.

Trampni shialarning “Hizbulloh” harakatining bir nechta qoʻmondonlarini yoʻq qilish maqsadida koʻplab tinch aholi vakillari halok boʻlayotgani, shuningdek, butun-butun binolarning vayron etilayotgani qattiq xavotirga solgan.

Bundan oldin Donald Tramp Binyamin Netanyahu va “Hizbulloh” rahbariyati bilan Livanda oʻt ochishni toʻxtatish boʻyicha kelishib olganini maʼlum qilgan edi. Isroil bosh vaziri bilan telefon orqali oʻtkazilgan suhbat yakunlariga koʻra, Amerika yetakchisi Isroil qoʻshinlari Bayrutga yuborilmasligini qayd etgandi.

Bungacha Tasnim agentligi Isroilning Livandagi eskalatsiyasiga norozilik belgisi sifatida Tehron Vashington bilan xabar almashishni toʻxtatgani haqida xabar bergan edi.