2025-yilda global harbiy xarajatlar 2,887 trillion dollarni tashkil etdi — bu bir yil oldingiga nisbatan 2,9 foizga koʻpdir. Bu haqda TASS Stokgolm xalqaro tinchlikni oʻrganish instituti (SIPRI) hisobotiga tayanib xabar bermoqda.

AQSHda xarajatlar qisqargan boʻlsa-da, Yevropada 14 foizga, Osiyo va Okeaniyada esa 8,1 foizga oʻsdi. Qoʻshma Shtatlar, Xitoy va Rossiya jami boʻlib 1,480 trillion dollar (umumiy jahon hajmining 51 foizi) sarfladi.

“Harbiy xarajatlar ketma-ket 11-yil oʻsib bormoqda. Ularning yalpi ichki mahsulotdagi (YIM) ulushi 2,5 foizga yetdi, bu 2009-yildan beri eng yuqori koʻrsatkichdir. Yillik oʻsish surʼati 2,9 foizni tashkil etgan boʻlsa-da, bu 2024-yildagi 9,7 foizdan sezilarli darajada kam. Bu sekinlashuv katta darajada AQSHda ushbu sohadagi xarajatlarning kamayishi bilan izohlanadi”, — deyiladi xabarda.

AQSHdan tashqaridagi umumiy xarajatlar 2025-yilda 9,2 foizga oʻsdi.

“Global harbiy xarajatlar 2025-yilda yana oʻsdi, chunki davlatlar navbatdagi urushlar, noaniqlik va geosiyosiy tebranishlar yiliga keng koʻlamli qurollanish dasturlari bilan javob qaytardi. Hozirgi inqirozlar miqyosini, shuningdek, koʻplab davlatlarning harbiy xarajatlar boʻyicha uzoq muddatli maqsadli koʻrsatkichlarini hisobga olsak, bu oʻsish, ehtimol, 2026-yil oxirigacha va undan keyin ham davom etadi”, — deya qayd etdi SIPRI dasturi ilmiy xodimi Syao Lyan.