“Moliyaviy xizmatlar ommabopligini oshirish, kichik va oʻrta biznesni qoʻllab-quvvatlashni kengaytirishga doir navbatdagi chora-tadbirlar toʻgʻrisida”gi Prezident qarori qabul qilindi. Bu haqida “Huquqiy axborot” Telegram-kanali xabar berdi.

Maʼlum qilinishicha, ushbu qarorga koʻra, 2026-yil 1-iyulgacha kredit olish uchun ariza berish hamda ariza boʻyicha bir nechta banklarning takliflarini olish imkonini beruvchi raqamli moliyaviy platforma ishga tushiriladi.

Shuningdek, tijorat banklari tomonidan mahallalar ixtisoslashuvi va “oʻsish nuqtalari”ni hisobga olib biznes gʻoyalarni ishlab chiqish orqali tadbirkorlikni qoʻllab-quvvatlashga yoʻnaltirilgan “AI maslahatchi” dasturi ham ish boshlaydi.

2026-yil 1-iyuldan “Kichik biznesni uzluksiz qoʻllab-quvvatlash” kompleks dasturi doirasida mikrokreditdan foydalangan va ijobiy kredit tarixiga ega boʻlgan tadbirkorlarga mikrokreditning garovsiz qismi 100 mln soʻmdan 200 mln soʻmgacha oshiriladi.

“Tadbirkorlikni rivojlantirish kompaniyasi” AJ tomonidan quyidagilar taqdim etiladi:

kichik tadbirkorlik subyektlariga kredit miqdoridan qatʼi nazar, uning 5 mlrd soʻmgacha qismi uchun foiz xarajatlarini qoplash uchun kompensatsiya;
har yili Dastur asosida qoʻllab-quvvatlangan va yuqori koʻrsatkichga ega 100 ta tadbirkorga faoliyatini raqamlashtirish, xalqaro standartlar va yashil texnologiyalarni joriy etish xarajatlari uchun 300 mln soʻmgacha grant.