Ayni kunlarda tadbirkor Elyorbek Nishonov tabiiy darmondorilarga boy malinaning har bir kilosini oʻrtacha 85-100 ming soʻmgacha sotmoqda. Bu yil ushbu xoʻjalik aʼzolari qariyb 2 ming tonna malina hosili olish va uning salmoqli qismini eksport qilishni rejalashtirayotgani inobatga olinsa, daromadni chamalab olish qiyin emas.

Shu tariqa Fargʻona tumanining “Obod” MFY hududida joylashgan “Alpomish Xosiyatxon” fermer xoʻjaligi tasarrufidagi 14 gektar yerda malina plantatsiyasi tashkil etilgan. Xoʻjalikda mahalliy navlar bilan birga Italiyaning 11 xil serhosil va eksportbop navlari ham parvarishlanmoqda.

— Yaqin yillarda malinachilik tarmogʻini oʻrganish uchun 10 ga yaqin davlatda boʻldim, ular orasida Italiya navlari har jihatdan maʼqul boʻldi, — deydi Elyorbek Nishonov. — Bu navlar mahalliy iqlim sharoitimizga mos, qolaversa, hosildorligi yuqori, mevalari yirik va uzilgandan keyin ham uzoq vaqt sifatini yoʻqotmaydi.

Eʼtiborlisi, Italiya malina navlaridan may oyining ikkinchi yarmidan boshlab, qishning sovuq kunlariga qadar barakali hosil olinayotir. Natijada yetishtirilgan mahsulot mamlakatimiz boʻylab yetkazib berilyapti hamda Markaziy Osiyo, Rossiya va Turkiya davlatlariga eksport qilinmoqda.

Tadbirkor tashabbusi bilan malinachilik kooperatsiyasi ham tashkil etilib, tumandagi “Obod”, “Navroʻz” va “Yuqori Vodil” MFYdagi aholi xonadonlari hamda 130 dan ziyod ixtisoslashgan fermer xoʻjaliklari bilan hamkorlik yoʻlga qoʻyilgan. Shuningdek, malinachilik kooperatsiyasi qoshida umumiy qiymati 3 milliard soʻm boʻlgan loyiha doirasida 400 tonna mahsulot saqlash quvvatiga zamonaviy ombor hamda qayta ishlash sexini barpo etish maqsadida amaliy ishlarga kirishildi.

Yangi loyiha ishga tushirilishi natijasida malinachilik kooperatsiyasida 50 dan koʻproq doimiy va 300 nafardan ziyod mavsumiy ish oʻrinlari yaratilishi kutilmoqda. Bu, oʻz navbatida mahsulotni sifatli saqlash, qayta ishlash va eksport hajmini yanada oshirish imkonini beradi.

Botir MADIYOROV, “Xalq soʻzi”.