-Yaqin – yaqinga qadar hovlilardagi boʻsh turgan xonalarda ipak qurti boqib kelinar, bu pillachining tashvishiga tashvish qoʻshardi,- deydi xalq deputatlari tuman Kengashi deputati M. Atoyeva. – Buni qarangki, pilla yetishtirish va uni qayta ishlash borasida boy tajribaga ega “Romstar”da yangicha usulni joriy etishdi. Korxona tomonidan metall konstruksiya asosida koʻchma pillaxona tayyorlandi. U qulayligi bilan koʻpchilikka maʼqul tushmoqda.

Bunday pillaxonani istalgan hududda tezkorlik bilan oʻrnatish va mavsum yakuniga yetgach qismlarga ajratib yigʻib qoʻyish mumkin. Ular har xil oʻlchamda ishlab chiqarilgan. Koʻp joyni egallamaydi. Koʻp qavatli. Deylik, 10x10 metr hajmli konstruksiya 4 – 5 qavatli boʻlib, unda 10 qutigacha ipak qurtini parvarish qilish imkoniyati mavjud. Ustki qismi esa brezent mato bilan yopiladi. Barqaror mikroiqlim yaratish maqsadida maxsus tuynuklar ochilgan. Mutaxassislar bu usulda ipak qurti boqish samarali, degan fikrda.

Joriy mavsumda tumanda 270 tonnadan ziyod “ kumush tola” yetishtirish va uning salmoqli qismini “Romstar” qoʻshma korxonasida qayta ishlab eksportbop mahsulot tayyorlash koʻzda tutilgan.

Istam IBROHIMOV, “Xalq soʻzi”.