Aprel oyida 6,5 mlndan ortiq isteʼmolchilarga 143,6 mlrd soʻm keshbek summasi toʻlovga tasdiqlangan. Bu haqida Soliq qoʻmitasi maʼlumot berdi.

Bildirilishicha, keshbeklarni ilovaga biriktirilgan bank kartasiga oʻtkazib olishingiz mumkin boʻladi. Buning uchun soliq mobil ilovasida “Face ID” dan oʻtish talab etiladi.

Qolgan summalar qachon toʻlanadi?

Belgilangan tartibga asosan tadbirkorlik subyektlari tomonidan soliq hisobotlari topshirilishi, hisobotlardagi kamchiliklar tuzatilishi, soliq qarzdorligi toʻlanishi inobatga olinib qolgan keshbek summalari avtomatik tarzda tasdiqlab boriladi.

Qayd etilishicha, isteʼmolchilar bir oyda bazaviy hisoblash miqdorining 60 baravaridan (24 720 000 soʻm) oshmagan xaridlari uchun 247 200 soʻm olishi mumkin.

Qaysi cheklarga va nima sababdan keshbek tasdiqlanmaganligini qanday aniqlash mumkin?

Buning uchun “Soliq” mobil ilovasining “keshbek” sahifasida “mening cheklarim” boʻlimiga kiriladi. Keyin, kerakli oy va korxona tanlanadi. Oynada shu oyda roʻyxatdan oʻtgan barcha cheklar aks etadi.

Keshbek tasdiqlanmagan cheklar qizil belgi bilan ajratiladi. U bosilganda chek holati, joʻnatilgan sana va mahsulot nomi bilan birga keshbekni rad etish sababi koʻrsatiladi. “Batafsil” tugmasi orqali chek haqida umumiy va qoʻshimcha maʼlumotlarga ega boʻlish mumkin.

“Agar siz tovar yoki xizmat sotib olgan tadbirkorlar soliq hisobotini taqdim etmagan boʻlsa, yoki unda kamchiliklar mavjud boʻlsa yoxud ularning soliq qarzdorligi toʻlanmagan boʻlsa, keshbek faqat shu kamchiliklar bartaraf etilganidan keyin avtomatik ravishda tasdiqlanadi”, — deyiladi xabarda.

Keshbek quyidagi hollarda hisoblanmaydi:

agar chek berilganiga 10 kundan ortiq vaqt oʻtgan boʻlsa;
oʻzini oʻzi band qilgan shaxslar xizmat koʻrsatganda;
avtomobil, havo va temir yoʻl chiptalarini sotib olishda, shuningdek, aloqa va kommunal xizmatlar toʻlov cheklari uchun;
jismoniy shaxslar shubhali xaridorlar reestriga kiritilgan boʻlsa
yakka tartibdagi tadbirkorlar hamda oʻzini oʻzi band qilgan tadbirkorlar tomonidan raqamli platformalar (Xolis Paynet) orqali berilgan xarid cheklariga.