Kecha Kanadaning Vankuver shahrida FIFAning 76-kongressi boʻlib oʻtdi. Kongressda soʻz olgan FIFA prezidenti Janni Infantino bir qator loyihalar, xususan, “FIFA Forward” dasturi orqali butun dunyo boʻylab futbol jadal ravishda rivojlanib borayotganini taʼkidladi.

Uning soʻzlariga koʻra, FIFAning 211 ta aʼzo assotsiatsiyasi bilan hamkorlikda amalga oshirilayotgan mazkur loyihalar soni avvalgi sikllarga nisbatan sakkiz barobar oshgan. Shuningdek, navbatdagi siklda “FIFA Forward” dasturi doirasidagi investitsiyalar rekord darajaga yetishi qayd etildi.

Kongress yakunida esa FIFA rahbari Falastin Futbol federatsiyasi rahbari va Isroil Futbol federatsiyasi rahbarini sahnaga taklif etdi va ikki rahbarga oʻzaro yarashuv maʼnosida doʻstona qoʻl tashlashni taklif qildi.

Ammo Falastin futbol federatsiyasi rahbari Jibril Rajub bunga rozi boʻlmadi. U oʻz joyini egallashi oldidan quyidagi gaplarni aytib oʻtdi:

“Genotsid sodir etayotgan fashistik hukumat vakili bilan qoʻl berib koʻrishmayman. Biz azob chekmoqdamiz. Siz buni tushunmaysiz”.

Shuningdek, Jibril Rajub Falastin tomoni Isroil terma jamoasi va klublari musobaqalardan chetlatilmagani sabab Sport arbitraj sudiga murojaat qilganini maʼlum qildi.