4-iyun tunida Yerda kuchli va uzoq davom etadigan magnit boʻroni boshlanishi kutilmoqda. Bu haqda Rossiya Fanlar akademiyasining Kosmik tadqiqotlar instituti huzuridagi Quyosh astronomiyasi laboratoriyasi maʼlum qildi. Prognozlarga koʻra, geomagnit boʻron G3 darajasiga yetadi, bu esa NOAAning besh ballik shkalasi boʻyicha kuchli boʻron hisoblanadi.

Mutaxassislarning qayd etishicha, Quyoshda roʻy bergan bir nechta kuchli chaqnashlar natijasida Yer tomonga plazma bulutlari otilgan. Hozirda sayyoramiz sari ikki yoki uchta plazma chiqindisi harakatlanmoqda. Ular yoʻl davomida birlashib, uzunligi taxminan 200 million kilometrga teng yagona tuzilmani hosil qilishi mumkin.

Hisob-kitoblarga koʻra, keyinroq otilgan plazma oqimlari avvalgilariga yetib oladi va natijada geomagnit taʼsir uzluksiz xususiyat kasb etadi. Mutaxassislar bunday ulkan plazma bulutining Yerni chetlab oʻtishi ehtimoli deyarli mavjud emasligini taʼkidlamoqda.

G3 darajasidagi magnit boʻronlari ayrim texnik tizimlar ishiga taʼsir koʻrsatishi mumkin. Xususan, GPS va GLONASS navigatsiya tizimlari aniqligi vaqtincha pasayishi, qisqa toʻlqinli aloqa va past chastotali radionavigatsiyada uzilishlar kuzatilishi ehtimoldan xoli emas. Shuningdek, atmosferaning yuqori qatlamlari qizishi sababli past orbitada harakatlanuvchi sunʼiy yoʻldoshlar faoliyatiga ham taʼsir koʻrsatishi mumkin.

Shifokorlar va olimlar magnit boʻronlariga sezgir odamlarga sogʻligʻiga eʼtiborli boʻlishni tavsiya qilmoqda. Ayniqsa, gipertoniya, yurak-qon tomir kasalliklari, depressiya, nevroz yoki bipolyar buzilishlarga chalinganlar xavf guruhiga kiradi. Bunday kunlarda ogʻir jismoniy va ruhiy yuklamalardan saqlanish, koʻproq suv ichish hamda kaliy va magniyga boy mahsulotlarni isteʼmol qilish tavsiya etiladi.