“Xalq soʻzi” nashrida “Mundial sari” rukni davom etadi. Bugungi sonimizda “B” guruhi vakili Kanada terma jamoasi haqidagi maʼlumotlar bilan tanishamiz.

Umumiy maʼlumotlar

Kanada futbol assotsiatsiyasi 1912-yilda tashkil etilgan. Ushbu mamlakat 1912-yildan beri FIFAning aʼzosi hisoblanadi. Shuningdek, mamlakat 1961-yilda Shimoliy va Markaziy Amerika futbol assotsiatsiyasi, yaʼni KONKAKAFning rasmiy aʼzosiga aylangan.

Kanada milliy terma jamoasi tarixdagi dastlabki oʻyinini 1924-yil 7-iyun sanasida Avstraliya terma jamoasiga qarshi oʻtkazgan va mazkur bahsda 3:2 hisobida magʻlub boʻlgan. Kanada termasi tarixdagi eng yirik gʻalabasini Kayman orollari termasi ustidan qoʻlga kiritgan. 2011-yil Bredenton shahrida boʻlib oʻtgan mazkur bahsda kanadaliklar 11:0 hisobida gʻalaba qozongan.

Kanada milliy terma jamoasi futbol boʻyicha jahon chempionatlarida jami 2-marta ishtirok etgan. Jamoaning mundialdagi dastlabki ishtiroki 1986-yilda kuzatilgan boʻlib, oʻshanda jamoa musobaqadagi ishtirokini guruh bosqichida yakunlagan. Shuningdek, jamoa 2022-yil Qatarda boʻlib oʻtgan jahon chempionatida ham ishtirok etdi va bu musobaqani ham guruh bosqichida yakunladi.

Kanada milliy terma jamoasi futbol boʻyicha Shimoliy va Markaziy Amerika futbol assotsiatsiyasi kubogi, yaʼni “CONCACAF Gold Cup” musobaqasida 20-marta ishtirok etgan va 1985 hamda 2000-yillarda oʻtgan turnirlarda chempion boʻlgan.

Jamoaning soʻnggi oʻyinlari

Kanada mamlakati jahon chempionatiga mezbonlik qilayotgani sababli mamlakat terma jamoasi mundialga saralashlarsiz yoʻl oldi.

Jamoa soʻnggi 12 oy ichida 15 ta oʻyin oʻtkazdi. Ushbu oʻyinlarning 7 tasi Kanada termasining gʻalabasi bilan yakunlandi. 5 ta oʻyinda durang natija qayd etildi va yana 3 ta oʻyin jamoaning magʻlubiyati bilan tugadi.

Ushbu bahslarda Kanada terma jamoasi Venesuela, Gvatemala, Ruminiya, Uels, Gonduras va Ukraina kabi terma jamoalarni magʻlub etdi. Shuningdek, Kot-dʼIvuar, Gvatemala va Avstraliya kabi jamoalarga magʻlub boʻldi.

Bosh murabbiyi

Ayni vaqtda Kanada terma jamoasini AQSHlik mutaxassis Jessi Marsh boshqarmoqda. U 2024-yil may oyidan beri jamoani boshqarib kelmoqda.

U bungacha boʻlgan faoliyati davomida Kanadaning “Monreal Impakt”, AQSHning “Nyu-York Red Bullz”, Avstriyaning “Zalsburg”, Germaniyaning “Leypsig” va Angliyaning “Lids Yunayted” kabi jamoalarida ishlagan.

Jessi Marsh murabbiylik faoliyati davomida 2 karra Avstriya Bundesligasida gʻolib boʻlgan. 2015-yil MLSʼning mavsumning eng yaxshi murabbiyi deya eʼtirof etilgan.

Futbolchilar

Ayni vaqtda kanadalik eng mashhur futbolchilar haqida gap borsa, quyidagi futbolchilarni eslab oʻtish mumkin:

Alfonso Devis — (“Bavariya”, Germaniya);

Jonatan Devid — (“Yuventus”, Italiya);

Tajon Byukenen — (“Vilyarreal”, Ispaniya);

Tani Oluvaseyi — (“Vilyarreal”, Ispaniya);

Ismael Kone — (“Sassuolo”, Italiya).

Jahon chempionatidagi oʻyinlari va uchrashuvlarning sanalari

Kanada milliy terma jamoasi jahon chempionati mezboni sifatida turnirning “B” guruhidan oʻrin oldi. Guruhda ushbu mamlakatdan tashqari Bosniya va Gersegovina, Qatar va Shveysariya terma jamoalari ham mavjud.

Ushbu terma jamoalarga qarshi bahslar quyidagi sanalarda boʻlib oʻtadi:

Kanada — Bosniya va Gersegovina (14-iyun);

Kanada — Qatar (19-iyun);

Kanada — Shveysariya (25-iyun).

Jamoaning mundialdagi imkoniyatlari

Kanada termasining imkoniyatlari faqatgina mezbon boʻlgani uchun bir muncha yuqoriroq baholanishi mumkin. Ammo, katta ehtimol bilan mazkur jamoa uchun oxirgi bosqich nimchorak final boʻladi.