Gollivudning eng mashhur komik aktyori Jim Kerri uzoq tanaffusdan soʻng ilk bor Parijdagi “Sezar” mukofotini topshirish marosimida ishtirok etdi. “Har narsaga qodir Bryus” filmi yulduzi sahnada faxriy mukofotni qabul qilib olib, fransuz tilida nutq soʻzladi. Biroq odamlar uning nutqidan koʻra, tanib boʻlmas darajada oʻzgargan qiyofasiga koʻproq eʻtibor qaratdi. Xoʻsh, ijtimoiy tarmoqlar nega Jim Kerrining “yangi yuzi” haqida bong urmoqda?

Marosimda Jim Kerriga yuksak mukofotni uning qadrdon doʻsti, “Begʻubor aqlning abadiy quyoshi” filmi rejissyor Mishel Gondri topshirdi. Aktyor kutilmaganda fransuz tilida gapira boshladi va oʻz ajdodlari haqida soʻzlab berdi. Maʻlum boʻlishicha, uning katta bobosi Mark-Fransua Karre asli Sen-Maloda tugʻilgan va keyinchalik Kanadaga koʻchib ketgan. Aktyor oʻz oilasiga minnatdorchilik bildirdi va chiqishini oʻziga xos hazil bilan yakunladi:

“Mening fransuz tilim oʻrtacha darajada, tilim esa gapirishdan allaqachon charchagan”, dedi u kulib.

Shuningdek, u sahnada turib qalligʻiga sevgi izhor qildi. Ammo tadbirdan soʻng tarmoqlarda aktyorning nutqi emas, balki tashqi koʻrinishi asosiy mavzuga aylandi.

Marosimdan olingan videolar tarqalishi bilan ijtimoiy tarmoqlarda qizgʻin bahs-munozaralar boshlandi. Koʻplab foydalanuvchilar Kerrining yuzi butunlay boshqacha boʻlib qolganini, uni hatto darrov taniy olmaganliklarini yozishmoqda.

Izoh yozuvchilar aktyorning tashqi koʻrinishidagi bu keskin oʻzgarish boʻyicha turli taxminlarni ilgari surmoqda. Kimdir 64 yoshli aktyor plastik jarrohlik yoki “goʻzallik ukollari”dan foydalangan, shu sababli uning mashhur yuz mimikalari avvalgidek emas, deb hisoblaydi. Biroq ashaddiy muxlislar orasida turli “fitna nazariyalari” ham paydo boʻldi. Baʻzilar haqiqiy Jim Kerri endi hayot emas, uning oʻrnini “klon” egallagan degan fikrlarni ham yozishmoqda.

Muxlislarning tarmoqlardagi izohlari:• “Kerri bu dunyoda plastik operatsiya qildiradigan oxirgi odam deb oʻylardim. Afsus...”;• “Yuzi butunlay boshqacha! Bu Jim Kerri emas, bunga ishonmayman”;• “Haqiqiy Jim qayerda? Bu odam unga oʻxshamaydi ham”;• “Millenial avlod vakillari buni darrov sezishadi. Bu butunlay boshqa odam”.Hatto baʻzi sahifalarda aktyor koʻzlarining rangi ham oʻzgargani haqida videolar tarqaldi. Jim Kerrining oʻzi esa bu gap-soʻzlarga hozircha hech qanday munosabat bildirmadi.

Maʻlumot uchun, Jim Kerri “Niqob”, “Eys Ventura” va “Ahmoq va anqov”, “Grinch — Rojdestvo oʻgʻrisi”, “Men, yana men va Iren” kabi filmlari orqali tanilgan. Uning har qanday qiyofaga kira oladigan, oʻta harakatchan yuzi va betakror mimikalari aktyorlik quroli kabi edi. Aktyorning hozirgi qiyofasi esa muxlislarni haqiqatdan ham xavotirga solmoqda.