Oʻzbekiston va Gonkong oʻrtasida 30 kungacha oʻzaro vizasiz rejim oʻrnatilishi rejalashtirilmoqda. Bu haqda Tashqi ishlar vaziri Baxtiyor Saidov maʼlum qildi.

Bildirilishicha, kecha, 3-iyun kuni Baxtiyor Saidov Toshkentda Gonkong maxsus maʼmuriy hududi Administratsiyasi rahbari Jon Li Kachchiu bilan uchrashgan. Muzokaralar davomida investitsiyalar, moliya, raqamlashtirish, sunʼiy intellekt, transport va logistika sohalaridagi istiqbolli yoʻnalishlarni muhokama qilingan.

“Gonkong rahbarining yurtimizga tashrifi Oʻzbekiston–Xitoy oʻrtasidagi barcha sharoitlarda har tomonlama strategik sheriklik munosabatlarini yanada mustahkamlash hamda mamlakatimiz bilan Gonkong oʻrtasidagi aloqalarni yangi mazmun bilan boyitishga xizmat qilishini qayd etdik”, deydi Oʻzbekiston TIV rahbari.

Uchrashuvda Gonkongning xalqaro moliya va biznes markazi sifatidagi tajribasi hamda salohiyati Oʻzbekiston iqtisodiyotini modernizatsiya qilish va ilgʻor loyihalarni roʻyobga chiqarishda muhim oʻrin tutishi taʼkidlangan.

Shuningdek, hududlararo sheriklikni rivojlantirish, ishbilarmon doiralar oʻrtasidagi bevosita muloqotlarni kengaytirish va qoʻshma tashabbuslarni ilgari surish masalalari yuzasidan fikr almashilgan. Muzokaralar davomida Oʻzaro vizasiz rejimni oʻrnatish toʻgʻrisidagi hukumatlararo bitimni tuzish niyati boʻyicha Verbal notalar almashilgan.

“Mazkur qadam fuqarolarimiz uchun qoʻshimcha qulayliklar yaratib, oʻzaro almashinuvlarni faollashtirishga xizmat qiladi”, deb yozadi vazir Saidov.