Jahon triatlon tashkiloti homiyligida tashkil etilayotgan “World Triathlon Championship Series – 2026” va “World Triathlon Para Series – 2026” xalqaro triatlon poygalari seriyasining eng yuqori pogʻonasi boʻlib, Markaziy Osiyoda birinchi marta oʻtkazilmoqda.

Mazkur nufuzli sport tadbiri oldidan “Silk Road Samarkand” xalqaro turistik markazida musobaqa tashkiliy qoʻmitasi aʼzolari va triatlon yulduzlari ishtirokida matbuot anjumani boʻlib oʻtdi.

Unda Jahon toifasidagi professional triatlonchilar — Henry Graf, Miguyel Hidalgo, Taylor Spivey, David Santero Del Sampo, Jeanne Lehair, Jeremy Kuindios musobaqa haqida fikrlarini bildirdilar.

Matbuot anjumanida triatlon boʻyicha xalqaro musobaqalar Samarqandda avval ham yuqori saviyada tashkil etilgani va 2024-yilda birinchi marta oʻtkazilgan jahon kubogi jahon triatlon tashkiloti, xorijlik sportchilar va muxlislar tomonidan yuqori baholangani qayd etildi.

— Ushbu turnirda 30 ga yaqin mamlakatdan eng kuchli atletlar ishtirok etadi, — deydi Oʻzbekiston triatlon federatsiyasi bosh kotibi Yelena Kun. — Musobaqa Samarqandning nafaqat Markaziy Osiyoda, balki xalqaro sport maydonida ham rivojlanayotgan jahon triatlon markazi sifatidagi maqomini yana bir bor tasdiqlashi kutilmoqda. Shu bilan birga, nufuzli sport tadbiri dunyo boʻyicha eng goʻzal shaharlardan birida sport, madaniyat va tarixni birlashtiradi.

Musobaqa ishtirokchilari 25-aprel kuni “World Triathlon Championship Series — 2026” doirasida Standard masofada 1,5 kilometr suzish, 40 kilometr velosiped poygasi va 10 kilometrga yugurish bahslarida qatnashadi.

26-aprel kuni “World Triathlon Para Series — 2026” da turli toifadagi para-atletlar, xususan, jismoniy cheklovlarga ega atletlar (PTS2-3-4-5), nogironlik aravachasidagi atletlar (PTWC) va koʻrish qobiliyati cheklangan atletlar, oʻz gidlari bilan (PTVI) ishtirok etadi.

Sprint masofasida esa 750 metr suzish, 19 kilometr velopoyga hamda 5 kilometrga yugurish musobaqalari oʻtkaziladi.

Triatlonchilar musobaqa davomida “Silk Road Samarkand” xalqaro turizm markazi hududi, eshkak eshish kanali, shuningdek, “Boqiy shahar” majmuasi boʻylab belgilangan masofani bosib oʻtadi.

Bugun mazkur nufuzli musobaqa oldidan erkaklar va ayollar oʻrtasida Oʻzbekiston chempionati boʻlib oʻtdi. Ishtirokchilar olimpiada talablari asosida 1500 metrga suzish, 40 kilometrga velopoyga hamda 10 kilometr masofaga yugurish bahslarida oʻz imkoniyatlarini sinovdan oʻtkazishdi.

Abdulaziz YOʻLDOSHEV, “Xalq soʻzi”.